諸朋好友｜林夏薇大爆曾被胡定欣漠視感失望：我冇去怪佢啦

由崔建邦及麥美恩擔任主持嘅全新一輯《諸朋好友》喺日前首播，第一集就搵嚟兩位視后胡定欣同林夏薇作客，期間二人分享相識經過，林夏薇更大爆曾被胡定欣「漠視」等等。

節目一開始就講到胡定欣同林夏薇喺2014年新加坡嘅《星和無綫電視大獎2014》上結緣，林夏薇被問到有冇俾胡定欣嘅前輩氣場感染到，佢就話之前都有睇佢嘅電視劇，雖然唔認識定欣，不過就會覺得佢係一個好努力同好想做好每一件事嘅人，所以會有一種距離感；不過現實生活中嘅定欣係好溫暖。佢哋因拍攝劇集《公公出宮》而變成閨蜜，定欣仲以為同薇薇年齡相近，因為佢嘅性格太成熟。

之後被問到佢哋有冇試過鬧交嘅時候，二人異口同聲表示冇試過，不過林夏薇就大爆曾因一件事試過對胡定欣感到失望，事緣喺一個大型場合中，林夏薇已經一早化好妝，坐喺化妝間等待髮型師整頭髮，當髮型師準備幫薇薇整頭時，定欣突然叫助手帶髮型師去幫其他藝人整頭，當下嘅薇薇感到難過，之後佢有回想並表示「我冇去怪佢啦，亦其實都過咗」。事後薇薇亦有同定欣講呢件事，並話自己有唔舒服嘅感覺，更表示當晚冇食嘢導致胃酸倒流同嘔，最後仲要坐輪椅上飛機，而胡定欣就表示對事件毫不知情，佢唔係故意，只係無心之失。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！