謝嘉怡拍片自爆持兩英國物業 大學時期已成功「上車」
現年26歲嘅2020年香港小姐冠軍謝嘉怡(Lisa),唔經唔覺已經入行接近兩年,雖然觀眾緣不俗,不過工作量唔算多,參演劇集暫時只有處境劇《愛·回家之開心速遞》。喺較早前,Lisa進駐內地社交平台「小紅書」,仲不時同網民分享生活日常及大玩「你問我答」等等。最近佢上載影片分享理財之道,期間透露自己喺英國已經有兩個物業,及唔會喺香港置業。
日前,謝嘉怡喺「小紅書」上載一條名為「理財|談談我在香港怎麼看待租樓和買樓」嘅影片,Lisa全程以英格蘭式英語分享理財之道,一開頭佢話香港同英國嘅樓價差異太過瘋狂,喺英國如果要買樓嘅話,房價應該係年薪嘅三倍,如果年薪30萬嘅話,咁就買大概60至90萬嘅樓,但係喺香港係好難搵到呢個價錢嘅樓,如果要買一間基本嘅樓,喺香港大約要1100萬港幣,25年3%嘅利率,每年就花費大約60萬港幣,如果年薪只有30萬港幣嘅話,實際上係負擔不起呢個價錢,所以佢亦未有買樓嘅念頭,而佢亦相信好多香港人都買唔起。至於租金問題方面,謝嘉怡認為香港嘅租金好貴,不過都係比買樓平好多。謝嘉怡再講到英國嘅樓市行情,指如果喺英國買一間兩房、有上下樓梯、連前後花園及有私人車道嘅房屋,大概只需平均100萬港幣。
之後,謝嘉怡就講述佢個人嘅儲蓄之道,佢喺讀大學嘅時候已經有全職嘅工作,而佢亦非常幸運地與父母同住,所以佢唔需要買柴米油鹽。佢可以儲起佢當時嘅人工,去到大學二年級佢已經儲夠錢去比首期,而佢再將物業出租,然後將收返嚟嘅租金儲起,再用呢筆錢去做第二個物業嘅首期。
最後謝嘉怡自認唔係一個物質主義者,佢仲話現今社會好多人買裙着一次就唔要,而佢就鍾意着到啲裙爛為止,而佢亦唔會花錢喺名牌包包上,佢寧願將啲錢用嚟買有價值嘅嘢。
唔少網民睇完影片後紛紛留言大讚佢貼地,例如「最down to earth的港姐了,希望年輕人都可以這樣」、「非常認可你的觀點」、「感覺嘉怡很接地氣」、「好貼地」及「Not only good looking but also good vision」等等。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!