雅虎香港新聞 【謝嘉怡疑爆粗】直播show講粗口 劉德華都瀨嘢 搞到登報道歉
今屆港姐冠軍謝嘉怡喺蘇格蘭成長，廣東話自然唔鹹唔淡，上星期六佢喺《善心滿載仁愛堂》打頭陣帶領嘉賓出場，點知講稿甩咀之餘仲疑似爆出英文F字粗口，事後謝嘉怡解釋嗰個只係「服」字，純屬無心之失。
直播節目冇得剪接，任何出錯立即見街，所以出得場嘅藝人都識得小心謹慎，只不過總有出錯嘅時候，就連天王都出過事，搞到好大鑊！
劉德華死食貓跟稿爆粗 報紙登道歉啟事
向來形像正氣嘅劉德華，喺1995年TVB台慶嘅趣劇上，講咗句「杏色加橙色……杏加橙」，全港觀眾嘩然！事後廣管局收到六百幾宗投訴，劉德華亦喺報章上登道歉啟事。因為太震撼，即使當時劉華已經係天王，TVB都要暫時唔安排佢上節目。
幾年過後，劉德華接受訪問重提舊事，佢話當時節目導演為求自保，同外界講句對白係華仔即興加插，而事實係劇本有呢句粗口，佢只好照稿讀。華仔之後冇再追究，係因為「啃」得起呢隻死貓，所以佢都無公開係邊個「跣」佢。
衰收尾 梁漢文好心做壞事
長壽籌款《歡樂滿東華》最出名係節目時間長，做到零晨3、4點先完場，1995年有份留守《東華》到最後嘅梁漢文，同一大班歌手做人肉佈景板大合唱，以為支咪唔收音，眼見其他人喺度嬉戲，於是講咗句「唔好咁×嘈」，點知直接出街。事發後大家都估邊個歌手爆粗，一度矛頭直指陳小春。大約一星期後，唱片公司安排梁漢文見記者認錯，Edmond亦因此被TVB雪藏幾個月。可能並非出於惡意，事件對Edmond冇咩大礙。
嬲得滯？曾志偉疑似鬧總理
大台「大show之寶」曾志偉2010年參加《歡樂滿東華》，負責打哥爾夫球籌款環節，點知平時打得唔錯嘅志偉哥當晚眼界奇差，完成之後更加掟球棍，再加多句「點都好x多謝總理」，網友個個監聽完都話係爆粗！另一位司儀鄧梓峰就相信志偉冇講粗口；睇返網上片段，志偉聽落都有可能係講「點都好啦多謝總理」，疑似只係「撻音」。
㩒錯掣火滾 曾志豪咪後爆粗出晒街
電視台以外，電台都係直播出事高危地點，尤其是冇燈光化妝，主持嘉賓狀態輕鬆，一時漏一兩句都唔出奇。港台主持曾志豪喺2018年7月主持《瘋show快活人》節目期間爆出四字粗言，佢都知出咗事，立即喺節目中道歉補鑊，不過港台都係決定要曾志豪停工兩星期「反省」。至於點解爆粗？港台發言人話，曾志豪本來要播宣傳聲帶但係㩒錯掣，嬲起上嚟爆咗句粗口，點知原來支咪開著咗，全世界都聽到！港台事後收到79宗投訴，被通訊局發出勸喻。
出緊街hold唔住 陳逸寧商台訪問直接講粗口對白
《志明與春嬌》系列電影捧紅咗飾演千嬅老死嘅一班女角，包括喺戲入面叫春嬌「腿張開」嘅陳逸寧。喺第三集《春嬌救志明》嘅電台宣傳，Isabel拍住楊千嬅以及飾演Brenda嘅林兆霞上商台節目接受直播訪問，提到粗口戲中對白，Isabel竟然照直講「條臭X叫你春嬌姐！」，同場嘅千嬅嚇到大叫，直言「嗌到好似中咗槍咁」，又話Isabel太投入角色先至咁講！Isabel同主持人都喺節目內道歉，不過通訊事務管理局表示收到3宗投訴，向商台發出強烈勸喻。
