【謝嘉怡的師姐們】雷莊𠒇 張舒雅 劉倩婷 呢班港姐冠軍去咗邊?

·2 分鐘文章

2020年度香港小姐競選順利完成,由海外佳麗謝嘉怡以大熱姿態當選。今屆港姐以「逆市筍工」做口號,但係港姐冠軍唔等於喺娛圈平步青雲,亦有人選擇履行一年任期之後離開大台,再覓人生軌道!

雷莊𠒇

2017年冠軍,決賽當晚得評審之一鄭裕玲投下決定性一票,險勝本來同票的佳麗何依婷而奪冠。由於過程備受質疑,雷莊𠒇喺Instagram拍片話I don't care about people not liking me,被指言行寸咀。

雷莊𠒇完成一年港姐工作之後返回加拿大發展,現定居於多倫多,主力參與廣告演出。

劉倩婷

2009年冠軍,卸任後繼續效力TVB,但幕前演出機會不多,主要參與主持工作,於2011年拍攝節目《香港玄案》認識玄學家李丞責並且交往。當時有傳劉倩婷介入李丞責婚姻,後來李丞責解釋2010年已經同前妻分開。劉倩婷李丞責於2013年結婚,劉於翌年不與TVB續約,2016年誕下女兒。

張舒雅

呢位2008年冠軍被封為「最Hea港姐」,因為佢當選1個月後就向無線請病假,但同時又被傳媒影到陪男友夜蒲。張舒雅亦無完全履行港姐職責,拒絕出席活動,更退選世界小姐及國際中華小姐,令TVB大為不滿,決定將張舒雅雪藏,甚至禁止佢出席2009年港姐決賽及為新一屆港姐加冕,成為史上第一人!

「被卸任」嘅張舒雅曾經重操故業做返model,而近年就幫手打理屋企嘅珠寶生意。

林敏俐

表妹係2009年冠軍劉倩婷,2002年林敏俐以海外佳麗身份參選贏得冠軍。林敏俐喺娛樂圈「短暫停留」2年,拍過2部劇集咁大把,之後返回美國繼續學業,並且幫手睇住亡父留低嘅餐館生意,甚少公開露面。

劉慧蘊

來自溫哥華嘅劉慧蘊2001年參選港姐,一舉奪得最上鏡小姐、國際親善小姐、最具新世紀風采小姐獎及冠軍,但卸任後無留喺娛圈發展。值得一提嘅係,同屆三甲(亞軍簡佩堅、季軍劉嘉慧)都係卸任後齊齊離開電視台,反而落選嘅林淑敏依然喺幕前活躍。劉慧蘊之後嫁俾1997年冠軍翁嘉穗舊愛林孝基,早幾年有傳媒影到一家三口行街,劉慧蘊被形容「走樣」。