謝霆鋒演唱會︳疑似嘉賓名單曝光 兩大天王加兩位老友助陣？ 綵排片段流出預告有結他solo

謝霆鋒一連4場啟德演唱會今晚開鑼。畢竟今次係啟德主場館首個香港歌手演唱會，加上霆鋒有25年冇喺香港開show，令演唱會一票難求。但就有消息指，官方售票平台可能喺呢幾日有少量門券逐日出售﹐更有網民聲稱好彩買到。小編今早登上售票網但未有發現謝霆鋒演唱會放售，各位仲未有飛嘅可以搏下，千祈咪幫襯黃牛。

另外，網上已經流出謝霆鋒4場演唱會嘅嘉賓名單，勁到嘭嘭聲！有傳各場次嘉賓分別係劉德華、陳奕迅、容祖兒加Twins以及壓軸嘅張學友。網民認為名單相當有可能，因為Eason、祖兒同霆鋒份屬老友，Twins就係同公司同期藝人，張學友就同霆鋒合演電影《海關戰線》，劉德華同霆鋒喺未上畫嘅電影《怒火漫延》合作。不過有網民估計各嘉賓出場次序可能有唔同，認為由陳奕迅壓軸更合適，更有人認為霆鋒開show根本唔需要嘉賓。

未開show，但係有條謝霆鋒喺啟德綵排嘅片段已經曝光，片中霆鋒為歌曲《不是定理》彈奏結他solo，彈得相當流暢，似乎要一洗被諷「單線solo」嘅污名！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！