譚俊彥玩踢爆 湯洛雯秘嫁馬國明？

湯洛雯昨日與譚俊彥出席活動，席間男方表示靚湯可能已跟男友馬國明簽字結婚，女方即叫大家查清真相，還她清白。提到昨日是元宵佳節，她坦言忘記節日，未有約男友慶祝，會做乖乖女回家陪父母。

湯洛雯、譚俊彥、郭晉安與譚凱琪等，昨日出席無綫劇《失憶24小時》宣傳活動，譚俊彥玩遊戲時寫上「Get Married」，似向靚湯催婚，他否認：「冇得催，佢哋咁大個人，順其自然，可能佢哋已經簽咗字呢！」靚湯即沒好氣說：「你哋去查吓就真相大白。」

飛甩男友過元宵

提到昨日元宵，問靚湯有否約男友馬國明？她坦言完全不記得，放工後會返屋企陪家人。對於男友將北上個多月拍劇，她笑言不清楚對方何時出發及返港，慶幸可以用視像見面。提到日前她網晒兒時與爸爸湯鎮宗的合照，她說：「有網民話爸爸係小鮮肉，我條眉係同爸爸一樣，但細個成日畀人笑話係紫菜眉，搞到我喊。後來潮流興粗眉，大個先覺得粗眉有用。」

譚俊彥表示有讓女兒觀看他的新劇，但囡囡看得太投入而爆喊，續指自己小時候看爸爸狄龍在劇中殺人，他會大叫：「我老竇殺咗人，要快啲報警！」非常搞笑！他坦言稍後的劇情兒童不宜，與靚湯有親熱戲及抱起對方：「我自己睇都有啲驚，因為我冇着上身衫，當時未減肥，成個人肥嘟嘟。」

譚凱琪冇特別慶祝

至於郭晉安亦指女兒有追看新劇：「佢睇到識笑，佢對娛樂圈好敏感，覺得好神奇，因為我喺劇中會變咗另一個人咁。」而譚凱琪表示自從女兒出世後，未有為節日特別慶祝，但很開心一家三口一齊度過。