譚杏藍拍片自白 個個月遭性騷擾

東方日報
·1 分鐘文章

歌手譚杏藍(小花)日前出片自揭在學期間多次被性騷擾,「高峰期」更是平均每月1次,最嚴重一次是遭迎面行近的陌生男人揸下體,情況令人髮指!她受訪時表示片段出街後收到不少女性朋友及網民私訊,全部都是被性騷擾的經歷,至於一直被蒙在鼓裏的媽媽,則暫時未有出聲。

小花指若現時再發生同類事情、或見到有人被性騷擾,絕不啞忍︰「比起以前我『辣』咗好多,總之一定會揭發,再衝上去幫個女仔或者男仔,一定唔會再啞忍!」提及她於片段中表示性騷擾經歷會成一世烙印,但自言已漸走出陰霾,幾年前鼓起勇氣向男友恆仔及閨蜜剖白:「事發當刻真係驚到唔敢同任何人講,好彩身邊有佢哋聆聽,其實今次拍呢條片有少少餘韻嘅感覺、回憶係衝咗上腦。」她又指男友聽到後零反應:「佢只係『吓』咗幾下。」問到於職場上可曾被性騷擾?她坦言沒有,又自嘲零魅力:「身邊嘅男仔、前輩當我係男仔,對我好似冇乜興趣,哈哈!」