譚玉瑛／黎芷珊／蓋世寶主持新節目 網民創意改名爆笑合集！

今年年初，「獎門人」曾志偉和王祖藍雙雙回歸無綫做高層，並進行一連串嘅改革，早前有指其中一個新節目就係以「童你一起長大了」為主題嘅節目，更傳出將會由譚玉瑛、黎芷珊及蓋世寶擔任主持，取代《Think Big天地》。

唔少網民都認為無綫繼續炒冷飯，唔夠創新，所以佢哋就發揮無限創意，幫新節目諗個名，例如《430通波機》、《放入ICU》、《花甲傳真機》、《閃電平安鐘》、《閃電三阿姨》、《閃電全收經》、《養生收音機》、《至叻小人瑞》、 《至lag老朋友》、《Old Cake 天地》、《耆英天地》、《老人家傾下計》及《兒童經典50年》等等。

無綫搵譚玉瑛、黎芷珊及蓋世寶擔任主持的確係「童年回憶返晒嚟！」，不過節目對象唔係成年人，所以網民們認為佢哋嘅年齡會同小朋友有好大嘅代溝，紛紛留言話「到而家你唔係仲想要小朋友叫譚玉瑛姐姐下話，起碼都叫咗兩代人，好命D都叫咗三代人」、「以依家三位姐姐年紀黎講同小朋友有好大代溝喎！咪玩啦！」、「其實目標對象係咪我呢啲三十年前嘅兒童？？？」、「蓋世寶都變左鈣思寶啦」、「想係兒童時段吸引番d 80後嘅(兒童)？？？」、「仲做兒童節目？係咪應該做老友記」及「好心啦，搵吓啲後生仔啦，真係以為細路仔鍾意嬸嬸多過後生哥哥姐姐咩…」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！