【讀者投稿】老豆破產痴咗線嗰一年 我嘅人生有翻天覆地嘅改變

·8 分鐘文章

嗨!我係RACHEL,地球上其中一個生命體。

人生都係高底起跌,無咩特別,但你自己嘅人生絕對係由你自己去創造,嘩 ,好老土。

自細我可以叫做要咩有咩,生活喺正常嘅家庭。有一年,老豆生意失敗,痴咗線,係呢一日開始,好多嘢都改變晒。

最深刻嘅係有一晚我同家姐坐喺床度,手上拎住長遮,鎖好門,成晚聽住出面嘅倉鼠慘叫。因為我老豆買咗啲倉鼠返嚟,再用𠝹刀整死佢哋。我哋驚到唔敢出聲,係咁喊 ,終於驚到報警,我哋實在係好驚好驚⋯⋯⋯

又有一次,就嚟要面臨考試嘅我喺屋企溫書,老豆拖緊地,我唔敢郁坐定定喺到,嗰時仲係坐緊有幾隻腳好似八爪魚咁嘅電腦櫈,佢邊拖邊用地拖撞落我個櫈腳,我又係好驚,唔敢郁,點知我呢次唔郁就成為咗佢嘅爆發點。老豆一手就扯起我,我立即跑走,佢追到我入房,接住成張電腦櫈由頭車落嚟,嗰陣媽咪番工,阿哥家姐都唔喺屋企,我除咗喊同匿埋喺房外咩都做唔到。等到佢出咗去,我就立即跑出去鎖住屋企道門。夜晚屋企人番晒黎嘅時候,佢哋嘈起上黎,老豆郁手推媽咪,阿哥還手,我同家姐只係識喊,跟住佢大叫一句「你郁手!」,阿哥答佢:「你打阿媽呀!」 期間再講咗啲咩我已經唔記得,只記得佢講個個都想佢死,我答咗「係」。呢一個係我到依家都放唔低嘅一樣野,亦都係我人生同佢講嘅最後一句說話。

「其實你生意失敗,大家係一家人一定會支持你,點解你要咁睇唔開,成日覺得有人想整死你、害你,媽咪喺出面有男人?我哋想你死?你咁諗真係好自私⋯⋯」

之後佢返咗鄉下一段時間,12月24日我哋收到鄉下打電話嚟話佢自殺死咗,嗰陣全家人都喺屋企,大家都接受唔到呢個事實,我淨係選擇逃避唔想返去面對。糾纏咗一段時間,我哋決定搭直通車返鄉下見佢最後一面。返到鄉下已經係聖誕節正日,我哋去到一間房,地下擺住一個長木箱,佢就瞓咗喺個箱入面。我當時即刻覺得呢個唔係我老豆,佢明明好肥,點解會變得咁細,可以瞓喺一個長木箱入面,雖然都係有啲迫,但係我覺得唔會係佢。而媽咪已經開始崩潰⋯⋯

之後係一連串嘅身後事,啲親戚不斷話媽咪,雖然有啲潮州話我聽唔明,但係佢哋就係罵緊我媽咪,媽咪喊得好傷心,就喺呢一刻開始,我知道我要堅強,唔可以做一個懦弱嘅人,我要保護媽咪。返到黎香港我都無喺媽咪面前流過一滴眼淚,只會匿埋偷偷哋喊,因為我唔想佢擔心我。

過咗呢件事,我身上就有咗第一個紋身。
PROMISE . NO LIES . JUST LOVE
就字面咁解,承諾、沒有謊言、只有愛

呢組字係喺兩隻拖住嘅手上面,因為維繫呢樣嘢從來唔係單方面而係雙方一齊付出。呢個紋身代表住我人生嘅準則同我屋企嘅經歷帶比我嘅感受。

image

成長過程裏我拍咗幾次拖,有一次拍拖試過比男朋友追打,因為我要同一個男同學食飯,佢突然反口唔批准,嘈起上嚟就俾佢打。之後亦有一次拍拖,好似puppy love 咁,好sweet,我哋一齊咗三個月,有一日佢突然提出分手,原因係佢放唔低之前嘅女朋友,嗰一晚我去咗搵佢,希望可以挽回,點知比我見到佢拖住個女仔返屋企,嗰陣係冬天仲要落緊雨,我一直企喺樓下等佢。我同佢講,我見到你,佢覆我話「dun be silly go home」。係呢一個男仔身上我學識咗一樣野,佢親身教曉我所有男人都係用下面諗嘢。

image
image

之後,我都好怕要拍拖。直至有個男仔出現佢話好鍾意我,想同我發展,我好直接問佢:「你有冇諗過將來?如果冇嘅話唔好嘥我時間!後來,我哋一齊咗一年半之後,佢就同我求婚,但最終我哋都係結唔成婚。」 呢段期間出現咗背叛、唔信任,佢竟然同個女仔夾口供,我覺得呢件事好恐怖,就算佢跪喺我面前認錯,我心裏面始終有條刺。佢仲成日好似為鬧交而鬧交,我好討厭呢樣野,明明求咗婚,大家嘅身份角色都唔一樣,我好想佢都珍惜呢一段感情。嗰日我整親隻手出去銅鑼灣睇跌打,睇完搵佢,佢等咗我20分鐘,一落車佢就黑我面,我跟住佢一路行,佢問我想點。之後叫我走,我轉身就走。嘈咗一輪,佢提出分手,我話好呀,我哋嘅關係就咁樣結束咗。就算我哋已經求咗婚,影埋婚紗相,其實都唔會改變到我哋嘅決定,我都好慶幸我哋冇結得成婚,因為我哋真係唔適合大家。

image

其實點解我會咁想組織一個家庭?因為我覺得我嘅家庭好唔完整,我一直好渴望可以有一個自己嘅家庭,家庭對我黎講係有爸爸、媽媽,有應該有嘅身份同角色,但原來呢個諗法係錯㗎⋯⋯

image

之後再拍拖,大家有共識唔會結婚,佢大我15年。佢好照顧我,分手原因係大家都覺得大家變咗,佢有差唔多一年完全冇掂過我,之後我得到嘅回覆係佢嫌棄我某一樣野。感情無分對錯。

之後我開始自己搬出嚟住,搬出嚟先知原來自己可以咁獨立。其實係環境因素迫我變得更獨立,所有嘢都要靠自己,因為冇人會幫到我。搬屋嗰陣,我記得一日搬六七車野,自己好似螞蟻搬家咁,唔想朋友搵幫手,因為我唔想欠人哋人情。我住喺一個200尺都無嘅劏房,感覺好驚好陌生,完全瞓唔到覺。

「所有經歷演變成宜家嘅我,宜家嘅鄭曉樺。」

如果你問我點樣先可以過一個不一樣嘅人生,我可以答你宜家經歷嘅所有嘢對於每一個人嚟講全部都係不一樣。

2019年我有個同學因為錢銀問題跳樓
2019年社運、疫情到宜家。你嘅人生,我嘅人生,都係不一樣。
但,唔好輕易放棄。

呢個就係我嘅人生。
如果你睇完呢段投稿,就會知點解我咁鍾意黑色。
因為黑色最能夠帶比我安全感,因為黑色從來都係最唔顯眼。
如果你仲想了解我多啲,好歡迎你嚟認識我。

撰文:RACHEL (Instagram : r______225)

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能