豪宅成TVB節目示範單位 Tyson Yoshi爆內幕︰室內設計師氹我屋企人拍

香港人愛買樓，任何同樓有關嘅資訊都大有市場，《空間改造王》呢類家居設計節目更加係香港開電視嘅收視之寶。TVB財經資訊台都有同類節目《家居．築則》。《家》展示過一間港島南區豪宅，被眼利網民發現同歌手Tyson Yoshi（程浚彥）極之相似，甚至有人將Tyson Yoshi IG嘅相片同節目畫面做對比。

當事人Tyson Yoshi之後喺IG出story回應，踢爆節目係佢去咗台灣嘅時候拍，間屋嘅室內設計師係咁氹佢屋企人要求拍攝。俾人擺上枱不特止，設計師本來仲想同TVB透露屋主就係Tyson Yoshi，但被拒絕。Tyson Yoshi直言間屋上電視令佢極度反感，「但係又唔輪到我話事因為氹掂咗我屋企人／同埋本來諗住留喺台灣對我冇咩影響」，又認為設計師好想透過節目成名，而且同類私隱事件唔係第一次發生，Tyson Yoshi覺得「都幾無奈」。

現年27歲嘅歌手Tyson Yoshi喺英國讀書多年，2018年開始發表自己創作嘅歌曲，出道作To My Queen係佢有次同女友嗌交之後寫嚟氹返對方。後來佢亦寫咗另一首俾女友嘅歌，直情係以女友個名Christy命名。佢嘅作品喺香港同台灣獨立音樂界幾受歡迎，Christy嘅MV已經有過千萬次觀看，另一首歌I Don’t Give A 都有過百萬點擊，可能勝過唔少主流歌手。上年Tyson Yoshi 同姜濤、林家謙、Jer柳應廷一齊演出拉闊音樂會而更為人認識。由於Tyson Yoshi不時post自己家居照，從屋外風景所見，佢屋企應該位於深灣，估計至少值6千萬，由此推斷佢家境相當唔錯。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！