【財圈識真假】GEM改革回應訴求

港股市場的「GEM」（中文原名為創業板）陷入低潮，港交所（0388.HK）出台GEM上市改革諮詢文件，建議推出新的財務資格測試、重啟簡化轉板機制等措施。「高仁指點」話你知，高仁與「豬朋狗友」討論，財金界「巴打」普遍認同改革內容。

高 仁：哈哈！GEM走到生死關頭，港交所終於take action，推出GEM上市改革建議。各位「巴打」對諮詢文件內容有乜意見？

新財務資格測試合理

施友化：我諗重點係GEM現行嘅「現金流測試」之下，上市申請人前兩個財政年度經營業務現金流入總額必須超過3000萬元，一些增長型企業因研發開支高而缺乏淨現金流入，可能阻礙佢哋申請上市。新財務資格測試（即市值/收益/研發測試）正好迎合新經濟情況，吸引以科技及研究主導嘅企業申請上市。

程更計：港交所於2018年推行市場質素改革時，將GEM控股股東IPO後禁售期由12個月「加監」至24個月，要求佢哋加強對上市公司嘅承諾，以解決殼股活動問題。現時殼股活動已經大致上停止，24個月禁售期再無必要，相信大股東絕對贊成「減刑」。

高 仁：GEM發行人持續合規成本較高，今次諮詢文件都有提出改革建議，你哋有咩睇法？

施友化：近幾年主板和GEM嘅上市規則逐漸融合，原先要求GEM發行人強制季度財務滙報嘅理據已不相關，建議取消有關規定係適當。至於建議調整刊發年報、中期報告及上半年業績初步公告嘅指定時限，該做法與主板規定一致亦係合理。

程更計：另外，建議取消GEM發行人必須有一名執行董事擔任監察主任嘅規定，以及縮短GEM發行人聘用合規顧問年期由IPO後首兩年縮短至首年，也可以與主板規定看齊。呢啲建議都可以降低GEM發行人嘅合規成本。

簡化轉板機制助降風險

高 仁：殼股活動大致上已經絕跡，港交所建議實施「簡化轉板機制」，GEM上市申請人會welcome嗎？

施友化：梗係會啦！「簡化轉板機制」會鼓勵發行人喺GEM上市，GEM再有返簡單「跳板」轉去主板，就毋須等待直接申請喺主板上市。由於轉板申請人早喺申請GEM上市時便須由保薦人進行DD（盡職審查），可望減低現時透過委聘保薦人規定來減低嘅風險，若果加上連續3年定期刊發經審核財務資料，投資者有足夠資料衡量其財務情況及未來前景，故此認同毋須再委任保薦人及不需刊發達到招股章程標準上市文件嘅建議。

程更計：至於新「簡化轉板機制」之下，轉板申請人需要符合每日成交金額及成交量加權平均市值嘅測試，前者建議與現時由北交所轉往上交所科創板及深交所創業板須符合所需成交量嘅做法一致，後者建議有助降低在成交金額不高時透過少數交易推高或扭曲估值而達到最低市值門檻嘅風險。就建議最低每日成交金額定為10萬或5萬元，我哋經紀們梗係支持定為5萬元啦！

施友化：對於轉板申請前12個月及直至股份在主板開始買賣為止沒有嚴重違規嘅要求，發行人「升呢」要具備「靚靚仔仔」嘅合規紀錄，大家相信都唔會有任何異議。至於建議豁免由GEM轉往主板嘅發行人首次主板上市費，GEM發行人都會支持，因為可以降低轉板成本。

GEM系列．之三

本欄逢周一刊出

如想與高仁交流上市公司的財技個案及招數，請電郵至koyan@hkej.com。