賭王兒子何猷亨 實戰儲經驗 「我要做莊家9點」

蘋果動新聞
賭王兒子何猷亨 實戰儲經驗 「我要做莊家9點」
賭王兒子何猷亨 實戰儲經驗 「我要做莊家9點」

沒人知道私下的何猷亨。從沒接受過專訪、沒深入講過自己,沒有人知道他是英超球隊阿仙奴粉絲兼擅踢左閘,更沒有人知道他打過酒店暑假工、被人用檸檬掟落制服;外界只知道,他是賭王四房長子、上市公司澳博(880)助理營運總裁、「葡京人」創辦人和保良局總理,以及偶爾登上娛樂版。叫他形容自己,他說:「冇啊,我個人做嘢冇乜特別,通常我係just get it done,我唔係一個咁型嘅人。」你說呢?

第一次近距離見亨少,25歲年輕小伙子,大眼高鼻有賭王影子,一身西裝畢挺,僅西裝褲有點寬鬆,「為咗你呢單嘢(訪問),我5點先瞓,等我唞唞氣先。」今年亨少確是發市,賭業地產慈善瓣瓣有份,每日港澳兩邊走,忙得交關,「瞓到5個鐘好好喇」「有時呢間房講幾句,聽完跳過隔籬房繼續做囉。」當日是他第三個訪問。「時間係逼出嚟。」

要數近期代表作,自然是澳門綜合渡假村葡京人,近月才召開完記者會,母親四太梁安琪是大股東,而他則擔大旗,由諗項目意念、傾品牌酒店、落地盤考察,乃至對外講解通通攬上身,明眼人一看就知是考牌作。他說:「每一個項目都係考緊一個牌,每個項目個牌都唔同,今日考私家車牌,聽日考小巴牌,後日可能考巴士牌。」「都會好畀心機攞最好成績。」

他講了幾次讀書麻麻,自己全靠「實戰」累積了經驗,曾做過酒店、證券行和投資銀行。例如十六那年,第一份暑假工,一個太子爺到國際五星級酒店打工,不是坐辦公室指點天下,而是接待、送餐和執房。他說,當時一名國際級女歌星與女兒入住,點了雪碧,杯底附了檸檬。「個小朋友將塊檸檬攞起,話I don’t want a lemon,跟住掉咗落我件衫上面。」「我一世都記得。」

有沒有嬲?「當時我係話OK冇問題,我換過杯畀你。」「(以後住酒店)非常之好態度,因為自己親身經歷過。」自此與酒店結緣,在澳博新項目「上葡京」有參與傾品牌酒店;而葡京人兩間主題酒店「LINE FRIENDS」及「歐舒丹」更是由頭跟到尾。

講到「LINE FRIENDS」,寧舍開心,他說全靠一個靈感激發。「我哋最初只不過叫佢哋嚟開舖,開會突然間我諗到話,其實想整character酒店,就問有冇打算呢方面研究吓。」「有時啲靈感,夜晚想瞓未瞓著突然嚟,一嚟就會唔會畀自己停。」就連酒店大堂小雞Sally裝置,都是靠一個意念。「我話不如研究吓直頭將佢(Sally)變做一盞吊燈啦,畀人感覺似隻識飛嘅雞。」簡單一句,一拍即合,由頭到尾一年傾成。整個項目葡京人預期2020開幕。

25歲仔身兼數職,自然忙忙忙,睡眠愈來愈少,壓力愈來愈多,坦言沒空留意消防處吉祥物「任何仁」,而平日解壓就靠哥爾夫球及踢波,「其實我都係一個年輕人,都會吃喝玩樂、做吓運動。」問到支持哪一隊及踢哪個位置?他猶豫半响,方答--阿仙奴、左閘。那麼做生意是前鋒還是後備?「中場,因為唔同角度都係咁踢個波過嚟比你。」

最後,賭王何鴻燊講過,自己不會賭錢,亨少亦說不會賭錢,但將一副啤牌拿到他面前,著他揀一隻代表爸爸與自己時,他說「(爸爸)係King囉,我會想做隻9仔,(為甚麼?)莊家9點。」莊家9點,在百家樂中,一開牌就自動成為贏家。

採訪:張浚浩 張嘉鎣
撰文:張浚浩
攝影:曾憲威、鄒潔珊、馮峰、李楝芬
影片編撰:張嘉鎣
編審:倪敏慧

其他內容