贏在靚人靚景 包裝高檔 祥仔踩韓劇一樣老套

(綜合報道)(星島日報報道)昨日TVB新劇《商戰》舉行開鏡拜神儀式，主要演員黎耀祥、蕭正楠、曹永廉、黃浩然、胡定欣、陳凱琳及蔡思貝等都有出席。只見祥仔一身「都敏俊Look」亮相，他透露《商戰》會靚人靚景。文、圖：駱震寧 祥仔更表示：「我哋呢啲『麻甩佬』，成日都要補妝，我從影30年以來，都未試過咁姿整，每拍一個鏡頭都要照鏡同補妝。」問到可會出動私伙衫？祥子說：「咁又唔使，不過大家有共識，會着得時髦啲，希望營造一個高檔嘅效果。」祥仔坦言韓風勢力強大，已成潮流指標，他說：「就算追唔到，都希望香港可以高水平一啲。」 問祥仔可有看過韓劇？他說：「《星星》同《繼承者們》都有睇少少，如果話港劇老套，咁韓劇就老套到不得了。《繼》講有錢老竇嫌棄窮家女，真係似白燕、張活游，不過人哋包裝好，又有靚人靚景，其實拍咗幾百年戲，仲有咩新嘢可以拍吖？」 另外，有報道指不少藝人為錢北上拍爛劇，祥仔表示：「我沒拍過內地劇，所以唔知，不過藝人拍劇，無辦法保證一定會好睇，無藝人想拍爛劇，有邊個唔想拍王家衛嘅《一代宗師》？內地100套有80套爛劇，唔會每一套都係精品。」 陳凱琳坦認拍劇難 好姊妹陳凱琳跟蔡思貝一同參與《商戰》拍攝，談到首次拍劇，陳凱琳坦言如何演繹角色頗有難度，她說：「要我做番自己會比較自然，但係分析過角色，只有部分似自己，所以有難度。」她們表示戲分不多，亦只有少量對手戲，但戲中卻會有互相影響。此外，蔡思貝表示拍攝《牛頭愛搭馬嘴》時，已跟陳凱琳分享過經驗，覺得拍劇跟選美的經驗大相逕庭。 ■陳凱琳（右）、蔡思貝選完港姐，再合作拍劇。 ■張活游、白燕拍了不少正氣粵語片，但劇情到今天被視為老套。 ■祥仔坦言《星星》只係睇咗少少。 ■新劇《商戰》昨舉行開鏡拜神儀式，人人搶食燒豬。 ■祥仔坦言韓劇老套到不得了，似粵語長片，不過勝在靚人靚景。