赤柱海邊新派居酒屋 招牌梳乎厘鰻魚飯+自家製刨冰

·3 分鐘文章

唔少人放假會到赤柱嚟個一日遊放鬆下,最近海邊就新開一間西日Fusion風格嘅新派居酒屋,供應多款創意卷物、串燒。中間嘅吧枱日間主打甜品,好似自家製刨冰、3.6牛乳軟雪糕等,夜晚仲會變成調酒吧,吹住海風嘆Cocktail感覺零舍Chill!

赤柱海邊新派居酒屋
赤柱海邊新派居酒屋

Kome Kushi位於赤柱廣場地下,Kome係日文嘅「米」,Kushi就指「串燒」,店如其名主打壽司、特別係創意卷物同串燒。裝修以木製家具為主,加入鏡面元素同霓虹燈,有唔少打卡位呀。食物更特別請嚟有多年日本餐廳經驗嘅丸山信明先生擔任顧問,創作一系列糅合日本各地特色,創新又健康嘅菜式。

明太子白飯魚薄餅
明太子白飯魚薄餅

明太子白飯魚薄餅($108)

招牌菜式之一,用墨西哥餅皮作為餅底,表面灑上白飯魚、芝士、野菌、芝士同日本明太子。明太子嘅鹹香同白飯魚嘅鮮味估唔到又幾夾,加埋半融芝士,非常香口。

和風鰻魚梳乎厘飯
和風鰻魚梳乎厘飯

和風鰻魚梳乎厘飯($128)

必點嘅創意料理,將日本關西常見嘅滑蛋鰻魚配搭變成雞蛋梳乎厘加燒鰻魚,上層嘅梳乎厘口感非常輕盈,蛋香濃郁。下面嘅燒鰻魚更有淡淡焦香,肉質細嫩。可以配搭自家製鰹魚汁,增添濕潤度同香氣。

自家製免治雞肉丸
自家製免治雞肉丸

自家製免治雞肉丸($68/串)

嚟到居酒屋又點少得串燒?佢哋嘅免治雞肉丸用雞髀肉同雞軟骨手打而成,所以咬落唔單止有雞肉嘅軟滑彈牙,仲有一粒粒軟骨口感,層次豐富。加埋生蛋黃同日式燒汁,食落更滑溜惹味!

士多啤梨豚肉卷
士多啤梨豚肉卷

士多啤梨豚肉卷($48/串)

另一推介係福岡博多風格嘅豚肉卷,即係用油脂豐富嘅豬肉包蔬菜或者水果製作串燒。好似呢份士多啤梨豚肉卷咁,就以豬腩肉包原粒士多啤梨,以士多啤梨嘅酸甜多汁中和腩肉嘅油膩感。想再特別啲可以點埋煉奶,增加甜味。另外仲有荔枝、青提等都係坊間少見嘅配搭。

鰻魚芝士卷壽司
鰻魚芝士卷壽司

鰻魚芝士卷壽司($98)

創意卷物亦有多款選擇,鰻魚芝士卷壽司表面鋪滿鰻魚肉,下面嘅卷物就用咗柔軟微甜嘅Mascarpone Cheese,味道好夾。

刨冰(士多啤梨)
刨冰(士多啤梨)

刨冰(士多啤梨)($58)

炎炎夏日最啱食刨冰,餐廳刨冰現時有三款口味:士多啤梨、抹茶、沖繩黑糖,糖漿都係自家製作,味道自然唔過甜。士多啤梨呢款刨冰仲會附上煉奶同白玉,甜而不膩。

(左)Purple Haze,(右)Yellow Crush(即將推出,各$88)
(左)Purple Haze,(右)Yellow Crush(即將推出,各$88)

餐廳嘅Cocktail好啱打卡,好似以Gin酒為基底,加入藍蝶花同檸檬汁調配而成嘅Purple Haze。及後佢哋更計劃同本地Gin酒品牌白蘭樹下合作,推出三至四款獨家Cocktail!有興趣嘅話記得留意啦。

Kome Kushi
Kome Kushi

Kome Kushi 
赤柱佳美道23號赤柱廣場地下G05及G06號舖

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能