雅虎香港新聞 跳高女神楊文蔚自爆男友曾出軌 依然決定24年巴黎奧運後結婚
由193（郭嘉駿）、譚凱倫（Helen）、鄭伊琪（浩南）同郭奕芯(Ashina)主持嘅ViuTV節目《晚吹－戀講嘢》，尋晚（30日）一集嘉賓係香港女子跳高運動員楊文蔚(Cecilia）。早幾年Cecilia參加比賽嘅風采成為網友熱話，後來佢更因此有機會參與唔少廣告拍攝工作。下個月28歲嘅楊文蔚原來同男友Daryl已經拍拖10年！
Daryl同Cecilia中學時期一齊喺體院受訓而認識，後來Daryl追求Cecilia，仲趁中秋節表白，由此展開十年交往。不過佢地曾經遇過波折，楊文蔚大爆Daryl試過出軌同師妹有路！Cecilia3年前右腳阿基里斯腱撕裂已經夠傷，做完手術之後，Daryl擺低部手機喺病房張枱度，點知俾Cecilia見到有一堆message，而且以往嘅message統統刪走，好明顯有嘢，於是問個究竟。Cecilia話更傷心係聽到Daryl同男性朋友嘅錄音對話，係關於Cecilia同嗰位師妹嘅！Helen 問Cecilia點解要知得咁清楚，Cecilia就話因為自己個人好傳統，如果決定同呢個人結婚的話，就要知晒對方所有事。呢一點193十分認同。
戀情告急，楊文蔚嬲到即刻坐住輪椅都搬返體院宿舍避靜養傷，箍煲嘅Daryl日日喺宿舍樓下等候，又全天候好好照顧女友，好在最後都雨過天清，楊文蔚亦都再次相信Daryl。
Cecilia近年受傷患困擾，今年再發現左膝十字韌帶斷裂，要繼續養傷。雖然係咁，Cecilia仍然想參加2024年巴黎奧運，並且希望完成奧運後同Daryl共諧連理。而Cecilia喺《戀講嘢》播出期間喺IG開直播，談到康復進度時佢話6星期前做完手術，而家已經可以做單腳深蹲，預計明年初復操，估計下年9月亞運應該冇問題，仲講笑話「唔係就要做牙醫夫人（Daryl係準牙醫）」。
是日精選
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
