《踩過界II》「癲姐」蔡思貝返嚟啦！重溫無綫劇集醜女角色

娛樂圈靚女無數，所以只係靠性感博出位嘅話，一定好難喺娛樂圈立足。唔少女藝人都願意放低偶像包袱，挑戰醜女角色，從而令觀眾留下深刻印象。無綫劇集《踩過界II》正在播映中，主角蔡思貝不惜犧牲靚樣，以刀疤哨牙妹造型示人。其實過往無綫劇集都有唔少女藝人扮過醜女，而家就同大家重溫一啲經典醜女角色啦！

《踩過界》＆ 《踩過界II》趙正妹（蔡思貝飾）
出道初期嘅蔡思貝屢被彈演技，喺《踩過界》中不惜套上牙套扮哨牙，造型仲同電影《食神》中嘅火雞姐非常相似。佢終憑粗魯嘅哨牙妹癲姐一角令觀眾對佢改觀，仲奪得「最受歡迎電視女角色」。

《波士早晨》姚金鳳（何天兒飾）
劇中飾演李佳芯孖生家姐嘅何天兒，今次嘅造型絕對係一大突破，不惜「自毀」靚女形象，化身哨牙、朦眼、粗眉又黑嘅醜女姚金鳳，雖然有唔少網民都話醜到認唔到佢，不過亦有唔少網民話有驚喜，估唔到佢會咁大犧牲。

《阿旺新傳》李笑好（湯盈盈飾）
湯盈盈為角色一改靚女形象，喺劇中飾演嘅李笑好，佢為人心地善良又體貼，不過滿面雀斑、爆牙又披頭散髮。今次盈盈真係一醜成名，憑角色勇奪「最佳女配角」。

《無頭東宮》凌雲（陳妙瑛飾）
凌雲被好朋友楚楚換咗個樣，面上有大胎記同大粒癦，唔少觀眾一開始覺得很醜，但陳妙瑛將個角色發揮得好好，令到班觀眾覺得佢越睇越順眼。

《美麗在望》鄔文萃（容祖兒飾）
樂壇天后容祖兒拍《美麗在望》時已經好紅，不過佢都冇介意扮醜女。佢喺劇中飾演嘅鄔文萃性格樂天及心地善良，不過因身形肥胖、哨牙、大鼻及有粒大癦，經常被人嘲笑，仲慘遭男友出軌及被公司解僱，大受打擊下決定整容改變命運。

《迷》肖小紅（劉思希飾）
劉思希喺《迷》飾演激突牙肉嘅內地工廠女工肖小紅，為咗可以扮得更似，佢自己再加咗唔少小動作，例如行路八字腳、挖鼻及戙高腳坐等等。角色雖然醜但非常討好，唔少網民睇完都對劉思希另眼相看。

《奸人堅》凌玉翠（葉童飾）
葉童喺《奸人堅》嘅飾演哨牙嘅鄰家女孩凌玉翠，與何其堅（黃子華飾）經常鬥嘴，仲被挖苦嘲笑係「哨牙鬼」，不過後期二人擦出愛火花。今次呢個造型都算係佢演藝生涯最大犧牲之一，不過好彩觀眾都受落。

《平安谷之詭谷傳說》牛小妹（樂瞳飾）
樂瞳喺《平安谷之詭谷傳說》唔再行靚女性感形象。佢除咗將全身噴黑之外，仲要性格極度男仔頭兼要食過期饅頭等等，真係可以講係豁咗出去呀！

《老表，你好hea！》烏笄（吳沚默飾）
吳沚默為咗扮演醜女烏笄，不惜戴上核突假髮、畫到成面雀斑、黐上粗眉及畫黑棚牙，真係唔願意望多佢兩眼。

《果欄中的江湖大嫂》司徒菊（甄詠珊飾）
曾經行性感路線嘅甄詠珊，喺劇中飾演粗魯女人惡人菊，係一個又醜又惡嘅果欄工人。佢除咗要經常披頭散髮之外，仲要打扮不修邊幅及化到皮膚勁黑又多斑。同平時個樣差咁遠，唔怪之得網民話完全認唔到佢啦！