《踩過界II》「盲俠」王浩信回歸 重溫無綫劇集盲人角色

·4 分鐘文章

2017年劇集《踩過界》口碑及收視都好好,男主角王浩信更憑盲俠一角榮升視帝,成功躋身一線小生位置。而續集《踩過界II》喺噚晚正式首播,承接上一輯繼續有「盲俠」王浩信、「GoGo」張振朗及「顛姐」蔡思貝為弱勢市民發聲,盲俠仲挑戰唔少爭議性嘅刑事案件。為咗可以完美演繹出盲人角色,王浩信及張曦雯除咗付出時間去揣摩角色之外,佢哋仲去咗盲人協會學習視障人士嘅生活日常。其實過往都有唔少藝員飾演過盲人,不如而家就同大家數一數啦!

《踩過界》& 《踩過界II》文申俠(王浩信飾)
平權律師「盲俠」文申俠絕對係王浩信嘅代表作,文申俠因交通意外導致失明,佢不斷努力鍛煉出敏銳嘅四感,分別係聽覺、觸覺、嗅覺和記憶力都比一般人強好多,長大後更成為律師。喺劇中王浩信成功將視障人士特徵、眼神、活動等演繹得淋漓盡致,演技令人刮目相看,獲得觀眾及公司肯定。

《踩過界II》劇照
《踩過界II》劇照

《踩過界II》 邵美娜(張曦雯飾)
張曦雯(Kelly)喺《踩過界II》 中飾演好勝冷酷又迷人大律師Eva邵美娜,首集就講盲俠認識咗Eva,佢仲同盲俠一樣係失明人士,不過佢轉過頭又去搵GoGo調查盲俠,而今晚嗰集就講Eva被揭發佢係只係扮盲。

《踩過界II》劇照
《踩過界II》劇照

《殺手》閻素之(麥明詩飾)
之前經常被批評演技幼嫩嘅麥明詩,喺《殺手》中飾演盲女閻素之,係一位視障鋼琴老師兼調音師,透過耳朵及雙手去感應世界。其中有一幕佢演技大爆發,喺街頭聲淚俱下咁怪責爸爸(黎耀祥飾)連累佢失明兼失去媽媽,唔少觀眾都大讚佢演技有進步,令人眼前一亮。

《殺手》劇照
《殺手》劇照

《陪着你走》宋天從(胡杏兒飾)
劇情講述攝影師宋天從(胡杏兒飾)係一個視力正常嘅人,不過同父母去冰島旅行時發生交通意外,除咗雙親身亡之外,佢亦因此失明。性格樂天嘅佢冇自暴自棄,透過與導盲犬相處嘅日子去重拾自信,最終仲同甘言重(陳豪飾)有情人終成眷屬。首次挑戰盲人角色嘅杏兒,演技獲得觀眾讚賞,仲話佢演得好神似。

《陪着你走》截圖
《陪着你走》截圖

《降魔的2.0》嘉嘉(江嘉敏飾)
《降魔的2.0》搵嚟唔少藝員客串,當中包括江嘉敏,佢喺劇中飾演17歲盲眼少女嘉嘉,係豪仔(胡鴻鈞飾)嘅初戀情人。二人相識於櫻花樹下,原本係浪漫嘅愛情,佢仲令到豪仔回復人性,但可惜佢恢復視覺後知道對方係惡鬼,之後逐漸疏遠佢,最後仲畀佢殺死。雖然江嘉敏只係客串,但佢嘅演出已經令人印象深刻。

《降魔的2.0》劇照
《降魔的2.0》劇照

《是咁的,法官閣下》渠鉅偉(李國麟飾)
有「綠葉王」之稱嘅李國麟,演技毋庸置疑,可以話係演嗰樣似嗰樣。佢喺《是咁的,法官閣下》飾演范小宇(黃智賢飾)及饒力宏(關禮傑飾)嘅師父渠鉅偉,原來去咗外國過退休生活,不過回港後已失明。雖然佢嘅戲份唔多,不過就非常搶眼,唔少網民睇完佢都大讚佢好戲。

《是咁的,法官閣下》截圖
《是咁的,法官閣下》截圖

《賭城群英會》路平安(馬國明飾)
馬國明喺劇中飾演「OK仔」路平安一角,劇集尾段講到佢為咗救OK媽(謝雪心飾)而被屠城(劉兆銘飾)手下襲擊至失明。之後佢慢慢康復,不過為賭局而扮盲,於是屠大寶(吳家樂飾)去試探OK仔係真盲定扮盲,屠大寶就捉其女友小東(佘詩曼飾)及媽媽,仲喺OK仔背後強姦小東,但OK仔仍然笑笑口。雖然呢一幕嘅劇情同《賭聖3之無名小子》超級相似,不過馬明嘅演出就非常到位,獲得唔少網民讚賞。

《賭城群英會》截圖
《賭城群英會》截圖

《宮心計2深宮計》吳翠盈(袁潔儀飾)
袁潔儀喺劇中飾演前司膳房女史吳翠盈,其他人一直以為佢喺20年前失蹤,但原來係太平公主(陳煒飾)將佢禁固、額頭劃上「舌」字及雙眼弄盲等等,導致遍體鱗傷。之後,佢俾元玥(劉心悠飾)意外發現並被人救出,吳翠盈仲當眾指證太平公主,可惜最後被激到氣絕身亡。雖然袁潔儀嘅戲份唔多,不過就令觀眾睇得好投入。

《宮心計2》截圖
《宮心計2》截圖