車Cam直擊:客貨車溜後司機欲救無從 5消防員秒速救車

目睹客貨車溜後,數名消防員秒速救車連環圖。

昨晚(18日)9時許,有網民在社交網站上載一條令人擊節讚賞的車Cam片段,該片段長約57秒,但無顯示拍攝日期及時間。至今日(19日)凌晨3時許,該片段已有近6.5萬人次觀看,逾1400名網民畀like。

睇片

根據片段所見,現場在葵涌梨木道63至71號一工廈對開,一輛客貨車停在停車場出入口外,一名女子推着載貨的手推車在車尾位置,準備將貨物搬上車,司機則落車協助,因上址路段為暗斜,疑司機未拉好手掣,導致客貨車緩慢溜後,幸當時軚盤扭向左方,客貨車溜後時向左剷上行人路,未有撞及後方車輛。剛巧一輛消防細搶駛經,車上5名消防員見狀隨即以秒速飛奔落車施救,幸客貨車撞向行人路鐵欄後停下,片段亦告結束。

據拍下車Cam片的片主在網上留言指:「嗰度係梨木道,當時我停喺上址去隔離買嘢,幾分鐘之後上車整理,大概1分鐘後差唔多搞掂時,眼尾就瞥見前面架手推車開始翻側,而前面架客貨車亦挨左溜緊後。」

「當時我判斷冇嘢截到架車,佢會撞埋嚟我左邊,我就下意識撻車望後鏡轉R波,當時我後面一個車位有架七人車,我就鬆手掣溜後少少然後扭右,同時睇住啱啱經過嘅消防細搶停車、第一時間有4名消防員跳落車幫手,未幾再有一名消防員落車協助。我見架車畀條欄杆頂住唔再郁,就停低拉手掣入返P波,過左幾秒,消防員亦示意問我有冇事,我就打OK手勢。」

片主又指:「佢哋見架車已經穩固、現場無人受傷、亦無其他危險之後,隨即收隊離開。因為條欄杆無撞爛、無人受傷、無財物損失,現場亦無人要求,就無人報警。雖然架車唔係消防直接整停,但佢哋警覺性好高、行動好迅速專業,見到唔對路就即刻停車幫手,完全發自內心救急扶危為市民服務,值得讚揚,我喺現場都有啲眼濕!」

數名網民看完片段後回應:「好似拍戲咁,整隊消防員反應好快,好合拍,真正team work ,專業,抵讚」、「反應超快,香港消防員真係好優秀」、「不愧為最受尊敬紀律部隊」、「又見到真英雄出現」、「多謝香港消防員非常感激專業」。

根據運輸署《道路使用者守則》,駕駛者在斜坡泊車時應注意拉緊手掣,並把駕駛盤扭向合適方向,因在處理訴訟時,法庭在衡量道路使用者是否犯錯,及其錯誤程度,或會把當事人不守相關守則考慮在內,從而判斷其法律責任。

司機及推手推車女子企圖阻止客貨車溜後。
司機及推手推車女子企圖阻止客貨車溜後。
消防車上的消防員見狀飛奔落車。
消防車上的消防員見狀飛奔落車。