【辱華風波】MC Jin愛國往績 Rap住寸特朗普 反美國警暴被香港網友留言灌爆
改編自著名遊戲《Monster Hunter》嘅電影《魔物獵人》,喺中國內地上映冇耐,就因為一句被網民認為辱華嘅對白(詳見另文)而要全國下架。事件越鬧越大,而講呢句對白嘅MC Jin(歐陽靖),話咁快就喺IG出片解釋兼道歉,話對白原意同多年前西方一首辱華童謠(Chinese, Japanese, Dirty Knees),反而係想借呢個冷笑話突顯出MC Jin係來自中國嘅身份喎。
MC Jin由喺美國rap界彈起,到返香港發展,再繼而北上參加綜藝節目,都不時標榜自己係中國人身份。唔止rap詞成日寫「我係中國人」,連言論行為都好愛國,難怪喺內地咁吃得開!
鬧爆特朗普係唐老鴨
今年初新冠疫情爆發,美國總統特朗普將病毒稱為「中國病毒」,揸美國護照嘅MC Jin,先喺IG出post批評,後來再rap住笑特朗普係Donald Duck,又希望「侵侵」大選落敗。內地網民當然好buy,但係香港網民就負評不絕。
出片回敬辱華Rapper 對方刪片因為買惡人怕
如果《魔物獵人》嘅對白都算係辱華,咁美國Rapper Lil Pump2年前嘅作品,就真係好不敬嘞!因為用咗Ching Chong呢個詞語,即係洋人用來形容唔識聽嘅中文咁解,辣著唔少華人,MC Jin梗係有出片喪rap寸爆回敬,之後Lil Pump亦都刪片了事。但係有報導話,Lil Pump係費事得罪另一位華裔Rapper China Mac,事關幫派出身China Mac出名火爆,試過因為MC Jin喺rap battle寸佢朋友嘅女伴,於是槍擊MC Jin,好彩冇搞出人命!
反美國警察暴力 俾網友灌爆留言
唔少內地網友都喜歡以美國警察暴力執法事件,批評美國人權狀況。MC Jin亦唔例外,今年6月喺美國黑人男子George Floyd被警察壓頸致死事件之後,發文批評當地警暴及種族歧視情況。後來唔少香港網民留言叫佢關心香港情況,MC Jin好快就見一個block一個,甚至閂埋留言功能,好方便。