迷信奶奶迫新抱抱B檻火盆 吵大鑊驚動警察

親子王國 Baby-Kingdom.com

撰文:飛天中女Juicy媽

【親子王國分享】

婆媳之間不嬲都係相見好,同住難,所以新抱同奶奶不和嘅例子真係司空見慣。不過最近有位迷信奶奶,喺新抱抱住初生BB出院嘅日子,竟然喺屋企門口燒報紙,要求新抱「檻火盆」入屋,差啲整親BB!



論壇上有位新抱話佢生完B返屋企坐月,咁佢同老公、奶奶一齊住,但老公返夜班,所以新抱長時間都要同奶奶「困獸鬥」。但呢個奶奶相當迷信,新抱抱住BB出院返屋企嗰陣,奶奶竟然喺屋企門口燒報紙,係都要新抱冒險檻過個火先入到屋!新抱唔肯,奶奶仲一嘢扯新抱入門,差啲撞到BB個頭!

但原來「檻火盆」都不突止,新抱話佢奶奶習慣將啲垃圾雜物堆到一屋都係,成座山咁高,搞到屋企勁多蟲蟻曱甴,亦嚴重影響通風,但天時暑熱三十幾度,奶奶都堅持唔肯開冷氣,搞到焗親BB呀陰公!新抱護B心切同奶奶嘈起上嚟,點知兩個愈鬧愈激,奶奶仲報埋警搞大件事!

Juicy媽成日睇婆媳版,婆媳大戰吵大鑊就成日都見,不過嘈到驚動埋警察就真係少有啲!睇呢位新抱嘅描述,佢同奶奶都唔係省油的燈,都係有咩委屈有不滿就會出聲鬧人嗰隻!呢個新抱話好彩好老公企佢嗰邊,會心痛佢幫佢鬧奶奶,但始終呀老公返夜班成日唔喺屋企,新抱同奶奶日日咁硬碰硬……Juicy媽真係驚BB遲早會出事!

好多網友都留言叫呢位新抱唔理好醜,即刻搬走,以免繼續受氣盞搞到自己產後抑鬱,或者影響到BB,Juicy媽真係不能認同更多!呢位新抱仲坐緊月,情緒本身已經容易波動,如果仲繼續同迷信奶奶同住,真係唔敢想像之後會發生嘅事!為咗BB着想,絕對係走得快好世界!

Click入去一齊討論


即睇下一篇:BB止咳有法?首先細心聽佢哋點樣咳!

其他內容