《迷網》反應麻麻 演員劇情均被彈 網民:《警訊》劇集版

·2 分鐘文章

無綫新劇《迷網》喺今個星期一已經播出,觀眾對演員及劇情都反應麻麻地,再加上九點半播出嘅《殺手》有好大對比,令唔少觀眾都唔多睇好呢套劇。

《迷網》演員卡士弱

高海寧同楊明已經喺《婚姻合伙人》同《單戀雙城》合作過,今次喺《迷網》又做情侶,真係毫冇新鮮感。加上成套劇一個一線演員都無,同九點半播出嘅《殺手》實在差太遠啦!

《迷網》劇照
《迷網》劇照

《警訊》劇集版

可能編劇想透過《迷網》話俾市民知而家網絡騙案嘅小伎倆,提高市民警覺性,減少受騙嘅機會。不過劇集拍出嚟嘅效果,似足《警訊》劇集版,資訊性比較多。唔少網民都留言話好似《警訊》:「「叫返原名網絡騙案咪算囉,成套都警訊味」」、「簡直係劇集版《警訊》」及「以後警訊都用呢種方法? 唔怪得 Police 不用同港台合作」等等。

《迷網》截圖
《迷網》截圖

《迷網》劇情悶兼老土

劇集講述網絡大大小小嘅詐騙案,可能大家平時喺新聞同《警訊》都聽過,今次喺劇集講返差唔多嘅內容,會令觀眾覺得又悶又老土。

三線劇都有馬海倫

馬海倫喺《愛·回家之開心速遞》中飾演接龍集團嘅清潔女工蘇八(蘇姐),喺《殺手》中就係黎耀祥及龔嘉欣嘅經理人方太,而喺《迷網》就做楊明阿媽孖八姐,真係睇到個人好亂啊!

《迷網》劇照
《迷網》劇照

陳曉華讀對白欠感情

2018年港姐冠軍陳曉華今次係第一次拍劇,不過就已經做女二,大家對佢嘅表現都十分期待,可惜睇咗三集佢講對白,好似讀對白咁完全無感情,又好似有啲黐脷根,更加唔好講咩內心戲啦。唔少網民都讚佢幾靚,不過讀對白就要改善一下,紛紛留言話:「點解我聽到陳曉華講野有時好似黐脷根咁,但又唔係成日係咁」、「冇感情嘅讀對白」、「背稿既」、「痴脷根嘅」及「淨係對白都未講得掂, 讀稿咁, 又痴脷根。第一兩套劇做下 主角細妹 呢D 配角先好過,咁多戲份,盞累死佢」等等。嚟緊佢嚟緊會拍三套劇,其中一套仲要做女一,希望佢有進步啦!

《迷網》截圖
《迷網》截圖