逆天奇案︳被賞識約見面 點知撈亂咗 朱健鈞同鍾漢良因誤會改變星途

正在播放嘅《逆天奇案》客串陣容強大,連16年冇拍TVB劇嘅朱健鈞都搵返出嚟。當年朱健鈞喺TVB拍講述溫拿樂隊成名史嘅《少年五虎》擔正演譚詠麟,起步時聲勢比演鍾鎮濤嘅鍾漢良勁得多。但係後來鍾漢良被喺台灣竄紅嘅香港歌手邰正宵邀請過當地發展,食正「港星熱」一炮而紅,喺內地同台灣多年來人氣依然,最近拍嘅內地網劇《錦心似玉》仲有強勁點擊量,反而朱健鈞就成為娛圈「失蹤人口」。2個人星運逆轉,竟然係因為一個誤會!

鍾漢良
鍾漢良

話說眼見當時郭富城由TVB藝員過江發展爆紅嘅邰正宵,睇完《少年五虎》認為朱健鈞有發展潛力,於是搵中間人約見,但係結果同邰正宵見面嘅係鍾漢良。到底係誤會定其他原因就不得而知,不過當時鍾漢良同TVB合約到期,大台要求簽長約綁人,鍾漢良拒絕因此被雪藏。呢次會面正好俾鍾另一個機會,於是答應同邰正宵簽約,1995年夏天喺台灣推出專輯。舞蹈員出身嘅鍾漢良推出跳唱快歌OREA而迅速走紅,半年間出2張專輯,被當地傳媒稱為「小太陽」。出道第2年喺台灣拍嘅電影《超級班長》成為暑假票房冠軍,年尾仲拎埋十大偶像,人氣「MIRROR式」彈起。

不過即使朱健鈞同邰正宵見面,都未必會有相同結果,因為當時朱已經同TVB簽咗5年約。而喺出道初期朱健鈞都有唔少機會,包括處境劇《開心華之里》,情況有如而家喺《愛.回家之開心速遞》演「金城安」嘅周嘉洛。後來朱健鈞被投閒置散,一度同TVB解約轉戰馬來西亞拍影帶劇,2004年離開無線,又試過加盟亞視,都係寂寂無名。

逆天奇案︳被賞識約見面 點知撈亂咗 朱健鈞同鍾漢良因誤會改變星途
逆天奇案︳被賞識約見面 點知撈亂咗 朱健鈞同鍾漢良因誤會改變星途

雖然有咁嘅際遇,但係無損朱健鈞同鍾漢良嘅交情,鍾漢良早年有介紹朱健鈞返內地一齊拍劇,而杜琪峯拍《三人行》亦搵咗朱健鈞同鍾漢良一齊演出。近日鍾漢良同被指發福嘅阿嬌出席活動影合照,46歲嘅鍾漢良keep得唔錯,只係鼻樑比以前挺拔。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!