逆天奇案|趙璧渝愧疚畀唔到家用 捱窮追夢8年終遇機會

·3 分鐘文章
趙璧渝
趙璧渝

無綫劇集《逆天奇案》圍繞O記警察、CIB追查罪惡真相,播出以嚟好評如潮,觀眾除咗留意陳展鵬、林夏薇、黃智賢、馮盈盈等演員演出,喺劇中飾演陳展鵬下屬「妹頭」嘅趙璧渝(Osanna)都表現亮眼,不但喺首集以學生妹造型扮演臥底引起注目,近期單元故事「神秘組織洗腦案」亦以趙璧渝為主軸,講述佢同男朋友Rocky(陳偉洪飾)分手,失意下參加人生改造課程,從而揭發一場神秘組織嘅陰謀,有相當大嘅發揮機會。

趙璧渝喺2013年放棄學業,透過第26期藝員訓練班加入無綫,入行8年雖然參演過不少劇集,但都屬跑龍套角色,有時仲連一句對白都無份,直至呢兩三年先有啲起眼嘅角色,好似《白色強人》飾演急症室女醫生、《律政強人》飾演律師等;舊年喺《法證先鋒IV》飾演銀行女職員「程淘」,食完毒品異常亢奮企喺40樓天台跳舞演出一幕亦成功喺當時引起過話題,觀眾覺得佢嘅神情演得好似之餘,除剩黑色Bra上陣亦夠晒大膽。

今次《逆天奇案》喺趙璧渝從影以嚟最重戲份嘅一次,佢就表示首次有咁多鏡頭同對白都好大壓力,仲話經常瞓唔着同好緊張,因為好想演得好啲,好好把握今次嘅機會。由於角色需要打鬥同開槍,趙璧渝喺拍攝前都特別睇返《陀槍師姐》系列,又喺現場聽從武術師傅指導,不停練習開槍姿勢。趙璧渝喺《逆天奇案》嘅演出得到唔少讚賞同埋鼓勵,除咗圈外朋友,曾經合作過處境劇《愛·回家之開心速遞》嘅「大小姐」林淑敏亦有同佢打氣;亦因為《逆天奇案》嘅出眾演出得到唔少宣傳片、廣告接洽機會,仲拍攝緊古裝新劇《痞子殿下》。

雖然多咗工作,但趙璧渝一直以嚟追夢過程並唔容易,演藝事業停滯不前嘅佢試過戶口唔夠一百蚊,當見到身邊朋友結婚生仔,甚至置業,佢都試過懷疑自己,但就因為仍對演員抱有熱誠所以堅持落去。單親家庭成長嘅趙璧渝,某程度上唔放棄嘅動力有部份係源自於媽媽一直支持,佢表示:「自己好愧疚咁多年都畀唔到家用媽媽,仲要媽咪擔心我夠唔夠錢用。」而一向好少煲劇嘅媽媽亦特別為佢追劇。

趙璧渝
趙璧渝
趙璧渝
趙璧渝
趙璧渝
趙璧渝
趙璧渝
趙璧渝
趙璧渝
趙璧渝
趙璧渝
趙璧渝
趙璧渝
趙璧渝
《逆天奇案》劇照
《逆天奇案》劇照
《逆天奇案》劇照
《逆天奇案》劇照
《逆天奇案》劇照
《逆天奇案》劇照

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載