通頂捱到喊 拒錫錫得罪人 朱慧珊拍劇心魔

蘋果動新聞

朱慧珊絕對是娛樂圈的異類,花旦們個個爭崩頭想當女一,亞姐出身的珊姐卻有劇不接,寧願劈炮過檔無綫做主持,無綫要她拍劇,她寧願即走返娘家。全因珊姐拍劇拍到出心魔,試過捱夜拍劇辛苦到喊,自怨自艾好淒涼,人人擔心戲份不夠爆、不夠激,她就連錫錫對手也不肯,更與「至高無上」的導演出拗撬。

通頂捱到喊 拒錫錫得罪人 朱慧珊拍劇心魔
通頂捱到喊 拒錫錫得罪人 朱慧珊拍劇心魔

朱慧珊的演藝人生,從來都是無心插柳的。85年陪朋友參選亞姐,豈料友人被out,自己卻得了第四名,更儍更更入了娛樂圈,拍劇就做女主角,演出劇集包括《天橋》、《上海風雲》及《黑夜》等,後來轉職做主持又被賞識,節目從不間斷。

珊姐自言野心不大,甫出道就做劇集女主角,她不但沒有飄飄然,反而以「痛苦經歷」來形容︰「喺亞視頭一、兩年拍劇最多,但就俾呢啲痛苦經歷嚇怕咗。記得有晚喺龍翔道拍通宵戲,放消夜時我坐喺公園度拎住碗雲吞麵,一路食、一路喊,點解半夜要坐喺路邊食麵咁慘,冇得瞓又攰。」

除了捱夜,最難受是要拍親熱戲,珊姐說︰「當年親熱戲只係掂吓,記得拍《天橋》有場戲講我同老公喺房傾偈,之後要錫一啖,我死都唔肯,同導演講挨吓咪得囉。導演都堅持要我錫,最終我企硬冇錫,後來諗深一層,覺得自己好冇演員道德。可能入行年紀細,加上冇受過演戲訓練,當年選美都冇諗過入行,根本冇心理準備,所以後來索性唔拍。」

為了避拍劇,珊姐寧願劈炮離開亞視,89年轉投無綫不久,又被迫返娘家,她說︰「喺無綫十年,後來高層下令主持拍埋劇,藝員科同我傾續約時亦強調呢點,咁啱亞視又斟我返去做《今日睇真D》,拍劇始終唔係我尊長,咪走囉。」珊姐在無綫僅拍過《兄兄我我》及《橫財三千萬》兩套喜劇,沒親熱戲的。

難得珊姐身在娛圈,仍然不肯為五斗米折腰,不過提起她與第二任丈夫、富商賈鈞鵬,珊姐卻認為釣金龜「冇問題」︰「很多人以為選美出嚟好多人追,當時我冇㗎,可能因為深閨圈子細,老公係朋友聚會認識。釣金龜?冇問題喎!條件好嘅女仔搵高富帥唔係錯,不過用乜方法達成願望,或者揀對象只睇錢,咁又唔啱嘅!」

珊姐的夫妻相處之道是互相尊重︰「我當老公係親人又係朋友,同佢好多話題,有時會製造驚喜令佢開心,兩個人一定要咁至維持得耐。事業方面我算懶,後生就梗係要工作,但去到某個年紀,都要有心理準備退落嚟。」話雖如此,珊姐至今仍享受工作,剛播出的《香港狙擊搜》,珊姐表示既刺激又有挑戰性︰「我哋只係想做一個節目緊貼社會,主要講民生,我家好有興趣研究KOL同網紅,究竟佢哋嘅吸引力從何而來。」

其實,52歲的珊姐至今仍然愛嘗試新事物,她說近日學懂gel甲,試過整整一天弄指甲︰「扮靚係女人永遠嘅工作,一定唔可以懶,好多女人以為扮靚係為丈夫或者男朋友,其實扮靚係為自己。人要不斷進步,進步除咗工作上,儀容都要與時並進㗎。」

撰文︰祖李 攝影︰林德雄 場地提供︰Town

其他內容