《造星III》Alina褲仔走位 擊「股」贈興

東方日報
·2 分鐘文章
Alina跳舞期間出「股」惑,但她強調打足底。
Alina跳舞期間出「股」惑,但她強調打足底。

ViuTV昨日5周年台慶,全體藝員大晒冷,場面墟冚!當中《全民造星III》學員Alina出「股」惑跳舞祝賀,性感程度爆燈,成功搶Fo!

昨日的台慶活動甫開場,強尼便反傳統率領全場謝幕,大搞新意思!環球新跳唱組合P1X3L打頭陣演出,緊接有駱振偉、岑寧兒、《全民造星III》三甲及同屆學員張右雨、Alina登場,當中穿上白色熱褲的張右雨不時露出黑色打底褲,而身穿性感舞衣的Alina,勁舞時頻出「股」惑!

騷後Alina偕ANSONBEAN受訪,問是否露股演出?她笑言有打底,只是動作太大令褲仔走位:「條褲攝咗上去,但我加咗條橡筋固定,冇驚過會走光,只驚跳得唔好。」ANSONBEAN則透露將跟同門師姐鄭欣宜推出合唱歌,對於欣宜於比賽時見到他即心心眼話「濕晒」,問他可會買定地拖給對方?他笑說沒有,但有帶梳蕉探班,可補充體力。

至於被封「一哥、一姐」的強尼及陳俞希(Hailey)表示,電視台5年來成功做到畀更多選擇香港人這個承諾,在台上做主持寧舍感觸。對於外間指無綫專程邀請曾志偉回巢對撼ViuTV的綜藝節目,Hailey笑說:「我唔敢講自己威脅到人哋,我睇得自己好微小。」而強尼則自言只是做好本分。

梁祖堯為MIRROR平反

另外,組合MIRROR早前到梅窩拍節目時被Fans貼身「追捕」,姜濤等12子出面勸Fans離開而惹爭議,他們多次重申不會拎Fans開玩笑。而主持梁祖堯對於被Fans鬧爆表示沒有不快,指節目6月出街後,Fans就會知箇中原因:「佢哋係唔啱,因為現場有危險,啲Fans好近距離咁用電話影佢哋,其實我都唔係好明點解要咁做,如果佢哋介意畀人影到,佢哋就唔應該咁影,係人都有感受,係咁影有冇當過佢哋係人?」

捲入鬧Fans風波的姜濤,收拾心情載歌載舞。
捲入鬧Fans風波的姜濤,收拾心情載歌載舞。
梁祖堯翹實拍檔Hailey扮恩愛。
梁祖堯翹實拍檔Hailey扮恩愛。