遇熟人尷尬避露面「晶女郎」梁敏儀冇工開 轉行賣蛋糕

轉行賣蛋糕的梁敏儀直言打工不算辛苦,但長時間站立就有點吃力。
轉行賣蛋糕的梁敏儀直言打工不算辛苦,但長時間站立就有點吃力。

昔日「晶女郎」、曾拍過《金錢帝國》及《賭城風雲》等電影的梁敏儀因疫情關係,已超過一年沒登台工作,日前被發現在觀塘某間大型蛋糕店做店員,收銀及招呼客人一腳踢。她受訪時坦承為了養家,之前連倉務員都做過,又透露在餅店工作期間曾遇上演藝同行,起初會尷尬地背向他們,但現已衝破心理關口。

疫情陰霾下演藝界工作驟減,不少藝人被迫轉行,影星梁敏儀亦不例外。現年45歲的她,於1999年參選港姐入行,曾拍過不少三級片,包括《金瓶梅II愛的奴隸》、《安非他命》及《古惑仔:江湖新秩序》等,不乏大膽床戲。

隨着年紀漸長,她揚言不會再拍三級片,笑言沒人想看姐姐剝衫,近年改以登台工作為主,惟在疫情打擊下,她為了生計無奈轉型。日前她就被發現穿上制服在觀塘一間大型蛋糕店開工,要負責招呼客人、包蛋糕、沖咖啡及收銀等工作,忙得團團轉,全程表現熟手及專業,至傍晚近7時才換便服收工。

登台工作全面叫停

敏儀事後受訪時承認在蛋糕店打工,透露以前收入來源主要是北上登台,惟疫情爆發後所有工作叫停,她只好另謀出路:「最初係炒散(散工),兼職做倉務、麵包烘焙等,後來見疫情一直冇退就決定搵長工,喺蛋糕店做咗近一年。(會唔會唔習慣?)初時唔慣,有20年冇做服務性行業,有啲客人要求高。(有冇受到客人不禮貌對待?)有時啲客都幾難照顧,但嗰刻要對住佢哋笑。」

由藝人轉做服務性行業,她坦言初時未能放下心理包袱,尤其遇到同行時更感尷尬:「有啲客認出我,有啲係認到把聲。我亦遇過同行,嚟一、兩次我都唔敢正視,背對住佢,後來見多一、兩次就覺得要豁出去,我都係工作啫,自己放低咗仲開心。(同事知唔知你係藝人?)佢哋有問我以前做咩工,但佢哋後生,未必睇過我演嘅戲。我話返內地多,做Entertainment,佢哋曾經話傳聞你拍過戲,我就話:『係咩?傳聞你唔好信。』」

結婚6年的敏儀坦言收入大減要節衣縮食,幸而從事設計工作的老公未受疫情影響,對她亦很體貼,曾叮囑她若太辛苦就辭職:「我怕我唔做會亂諗嘢,其實份工唔算好辛苦,係長時間企。」她指這份工作得來不易,之前見過幾份工都未獲聘用:「主要係我唔知點寫CV(履歷),要寫之前做過咩,唔通叫人上網打我個名搵?仲要咁性感。我只寫喺內地做娛樂工作,見工時佢會覺得你唔夠坦誠,叫你等消息,試過幾次都係呢個問題。所以今次我好坦白,見工時話係演員,因為疫情留港,要搵份工。」

問到現時內地疫情緩和,會否參考其他藝人長留內地工作?敏儀表示不會考慮:「上去最多留幾個月,唔會長住,我喺香港有老公同家人。」至於將來有何打算?她坦言仍是未知之數,但必須有一技之長,計劃讀咖啡課程自我增值,希望將來可以開咖啡店,同時未忘演藝本業:「我年初都有拍戲,感恩兩邊夾到時間。希望多啲本土戲開拍,如果將來通關都會返內地登台。」

敏儀要兼顧收銀工作,殊不簡單。
敏儀要兼顧收銀工作,殊不簡單。
盡心盡力的敏儀招呼客人,詳細介紹各款產品。
盡心盡力的敏儀招呼客人,詳細介紹各款產品。