遠眺遊輪碼頭兼抵食!五間觀塘海濱餐廳精選

OpenRice開飯喇

提到喺觀塘搵食,唔少人都會諗起工廈餐廳,但近年觀塘海濱一帶都開咗唔少食肆,有齊酒吧餐廳、Cafe、多國菜同精品咖啡,食完再去觀塘海濱花園打卡,得咗。

半露天酒吧餐廳 Flames

圖: 雞翼尖,littletwinstar227
圖: 雞翼尖,littletwinstar227

半開放式感覺特別Chill,露天座位對出係草地平台,再對出就係海濱長廊,好啱Happy Hour嚟飲返杯。餐廳特別從外國引入燒雞專用爐,所以招牌菜葡式香辣燒雞做到皮脆肉嫩嘅效果,配搭味道香辣嘅Piri Piri Sauce,非常醒胃。

訂座優惠:主菜餐牌之二人套餐6折

玻璃屋嘆西餐 La Serre

圖: Alvin Yong,mc715
圖: Alvin Yong,mc715

位於海濱花園嘅玻璃屋餐廳,日間夠光猛夜晚又好Feel,而且天氣好嘅時候可以坐係室外吹海風。主打西餐同法國菜,水準平均,安格斯牛肉漢堡同香煎智利鱸魚柳配蜆肉白酒汁比較多食家推介,或者下午茶時間嘆杯咖啡配蛋糕簡簡單單咁都唔錯。

日本料理x咖啡 IF Coffee and More

圖: eataroundwithme
圖: eataroundwithme

一樣係落地玻璃同採光度高嘅餐廳,呢間今年先開嘅餐廳就主打咖啡同日本菜,Lunch Set嘅安格斯牛肉稻庭烏冬,同北海道魚生丼定食都足料好味。想食少啲就可以考慮食牛角包配咖啡,或者下晝三點之後去飲杯啤酒!

英倫風Cafe MG Cafe

圖: maggiegraphic,jodie_lky
圖: maggiegraphic,jodie_lky

呢間亦係Cafe,不過賣點係裡面嘅英倫風格裝修,天花嘅弧形木條,復古金屬吊扇、吊燈,黑白色雲石枱,意大利階磚等等,真係好啱打卡!最多人點Breakfast Fantasy,有黑松露炒滑蛋、沙律菜配芒果汁、燒菠蘿、車厘茄、煙肉、火腿、腸仔同多士,豐富又滿足。

自家烘焙精品咖啡 Sinbad Coffee Roasters

圖: wanwwy
圖: wanwwy

本地烘豆咖啡品牌,星期一至四都有新鮮烘好嘅咖啡豆,當然除咗買豆,亦可以飲咖啡啦。夏天推介飲透心涼嘅Cold  Brew,鍾意飲Nutty豆嘅話就可以試Flat White。咖啡果汁外,亦有供應Bagel、三文治、磅蛋糕等輕食。
 

 


文:Cathy

你可能還想看