那些年嘅體育明星 排球女神莎賓娜變膠樣嫁富商 體操王子阮馬素膝傷無緣奧運

奧運步入尾聲，睇咗2個禮拜點都唔捨得連場激戰……同埋一個個靚仔靚女運動員！每屆奧運都有男女神彈起，有睇咗2屆都係咁靚仔嘅英國跳王子戴利、中華台北嘅柔道銀牌選手楊勇緯、德國田徑女神Alica Schmidt等，的確係「睇肉」愛好者嘅心水。

長江後浪推前浪，咁以前追捧過嘅男女神而家又點呢？哈薩克排球女將莎賓娜同德國體操王子阮馬素都嚟過香港，仲記得佢地冇？

2014年去台灣參加比賽而被網民發現嘅「12頭身」排球美少女莎賓娜（Sabina Altynbekova），當年只得18歲就因為樣子甜美同高佻身形而成為星級運動員，連哈薩克國家隊教練都話佢運動員嚟講佢太靚！打波之餘莎賓娜仲參與幕前演出，拍廣告、上節目、出活動仲做下model，連香港嘅活動都出席過。後來莎賓娜去過日本同杜拜打職業聯賽，不過2018年世錦賽上，莎賓娜雖然入選國家隊但冇份落場。

去年12月莎賓娜同哈薩克電商才俊Sayat Salmanuly結婚，由莎賓娜IG睇到，佢而家過住名媛一樣嘅生活。雖然只有24歲，但係莎賓娜個樣同以前唔同晒，甚至有少少膠，似乎落咗唔少功夫變靚！

另一位曾經被香港觀眾愛戴嘅德國體操男神阮馬素，2012年倫敦奧運時奪得2面銀牌，受歡迎到試過出席香港一個舉行商場嘅「擊掌會」，仲成為健身室代言人，明星一樣！2014年阮馬素喺比賽時受傷，上屆奧運阮馬素都有參加但未能奪獎，今屆就再因為膝頭傷患無緣奧運。今年33歲嘅阮馬素，睇落依然靚仔好有態，唔知仲有冇機會3年後再次現身奧運？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！