郭奕芯出post放售西營盤物業 2021年800萬買入而家開價7字頭

早前被七師傅暗指背後中傷佢嘅郭奕芯Ashina，3年前以800萬買入恆基西營盤物業「藝里坊．2號」一個252呎高層單位。當時郭奕芯曾指用盡畢生積蓄俾首期，仲話之後要慳住使錢。

近年地產市道麻麻，仲開始湧現負資產，唔少業主都有意出貨。郭奕芯日前就喺小紅書帳戶出post賣樓，仲貼出多張單位內外照片，裝修相當新淨之餘，位處高層更睇到維港海景。Ashina內文就提到單位資料「藝里坊2期 低於市價7xx轉讓 越早決定價錢可議」，又指單位「只需1分鐘到達西營盤地鐵站～校網及餐廳都非常方便」。咦？咪即係Ashina自住嗰間？有網民以為郭奕芯轉咗行於是留言詢問，Ashina就回應話「這是我自己的物業」。

如果幾年前嘅報導屬實，咁Ashina開價7字頭放售單位，咪即係蝕住走？根據同一大廈物業成交紀錄，有個同郭奕芯持有單位面積相約、同樣屬於高層嘅放盤，喺今年初以650萬成交。即使座向唔同，都同郭奕芯入市個價相差成百幾萬……

郭奕芯13歲時參加校花選舉，後被邀請做模特兒，19歲時主演彭浩翔監製嘅電影《同班同學》。Ashina喺2019至2021年曾經簽約英皇，演出機會較以前多，包括主持ViuTV《晚吹－戀講嘢》、演出電影《恭喜八婆》等。2021年郭奕芯為七師傅主持嘅《七救星》做嘉賓，更成為對方首位螢幕前招收嘅徒弟。2022年傳出郭奕芯同富二代男友嘅戀情，Ashina嗰陣話係為公司先至高調公開，但因為約滿於是將感情事低調處理。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！