郭富城FullGear宅家鍊車

東方日報
·2 分鐘文章
城城是賽車發燒友,過去曾成立車隊。
城城是賽車發燒友,過去曾成立車隊。

鍾情賽車的天王郭富城自爆疫情後未能落場,靠玩虛擬賽車止癮,希望重開賽事後立即可以鍊番轉!他亦想透過錦標賽發掘人才,接受訓練後出賽。

城城昨日以形象大使身份出席電競賽車錦標賽活動,表示要犧牲玩電競的時間陪兩個女兒玩樂。

他透露家中有專業賽車裝備,不過去年因疫情關係不少地方零賽事,惟有靠電競止癮:「虛擬世界同真實賽車一樣,可以用嚟熟習跑道,玩啲專業虛擬賽仲會Full Gear上陣戴埋頭盔,玩完真係成身汗,可以鍛煉專注力同體能。(賽事重開就落場?)賽車可以減壓,因為有時工作要飾演沉重角色抽離唔到,依家加埋同小朋友出去玩,都減到壓。」

城城的慈善基金有份參與今次錦標賽,他希望藉此幫助基層人士:「會喺比賽入面發掘有潛質嘅電競手,因為勝出者會落真實賽道比賽,可以訓練佢哋,同時推廣呢項運動。」

蕊蕊參戰排第6位

同場的陳蕊蕊首次參加如此大型的公開錦標賽,女子組共有200人出戰,結果她排在第6名,雖然成績不俗,但只得頭5位可以入圍,所以她笑言唔抵:「今次好好彩,本身我前面有個好勁嘅車手,但佢炒咗車。所有選手都好勁,有啲係由專業車手訓練,拎到呢個成績算係咁,教練只教咗1日,又試過偷偷影低專業車手嘅練習片,返去係咁練。」她有意再找教練特訓,明年再參賽:「今次練到手指起繭、甩皮,又手腕痛,但見到每次快到1秒,就好有成功感。」

疫情影響工作,蕊蕊大呻雖然為錦標賽擔任代言人,又拍攝廣告、微電影及做直播節目,但收入依然減少:「直播收入唔穩定,希望長做長有幫補到。」

蕊蕊今年未能打入5強,望特訓後明年再戰。
蕊蕊今年未能打入5強,望特訓後明年再戰。