鄧月平「女將軍命」有錢要揈

年紀輕輕的鄧月平榮升老闆自組工作室，頭炮出新歌鼓勵大家要勇於表白，坦言曾後悔沒有講出口，錯過一段良緣。她指曾被相士批「女將軍命」，花錢好過儲錢，讓她更有決心花光積蓄創業。

現年23歲的鄧月平（Larine）與前公司完約後自立門戶，推出個人單曲《U》，闊別2年多再出歌的她說：「作曲人話係掛住人時寫呢首歌，我覺得好有feel，就將自己暗戀掛住人嘅情愫擺落去，改咗少少詞。」

她表示今次嘗試填詞是因為喜歡把感受寫成詩：「我發現備忘錄有2、300份詩詞，我係好感性嘅人，有感覺時就會寫低。」

異性緣一向差

她坦言由細到大都不敢表白，曾錯過一段戀情，她說：「想出呢首歌係因為覺得人生苦短，人嘅生命變幻無常，所以趁嗰個人仲喺度時要盡快講，如果怕講出口，就唱出嚟。（好後悔？）所以歌詞最後一句就係寫，『遙遠的最幸福狀態是有你的未來』。（依家學識咗勇敢同人表白？）如果依家遇到鍾意嘅人，我會講，但冇，哈哈。」

現時工作忙碌沒有時間拍拖，她說：「因為啱啱自組工作室，發現好多行政上嘅嘢幾難搞，又多咗參與創作，歌同電影方面有啲分身不暇，又拍飲食節目，想將事業圓滿啲先諗愛情。早幾年初入行冇安全感就比較渴望拍拖，想隔籬有人陪，但依家安全感係嚟自事業，依家真係好忙，如果有男友我應該會崩潰！」樣靚身材正的她又自言異性緣一向很差，笑言冇人追。

開心係無價寶

對於自組工作室，Larine是想趁年輕時搏一搏，投資了6位數，連嫁妝也拿了出來，幸好沒有蝕錢：「我之前上節目，堪輿學家話我係『女將軍命』，一定要使賺番嚟嘅錢，之前我係愈儲錢就愈難賺錢，如果銀行有舊錢我就會病或入醫院，但發現開咗工作室一直使賺番嚟嘅錢，一路啲job係咁嚟，幾神奇。（會唔會有壓力？）做唔到想做嘅嘢同冇錢兩樣都驚，但我比較驚做唔到想做嘅嘢，因為搵好多錢唔一定開心，但做到想做嘅嘢嘅開心，係無價嘅。」