鄭伊健姚子羚送別錢國偉

金牌監製錢國偉設靈儀式昨日舉行，生前好友錢嘉樂、鄭伊健夫婦、林曉峰等在場幫手打點，遺孀陳宛蔚眼濕濕表示此乃farewell party，她會秉承老公精神，好好照顧自己及女兒。

錢國偉10月底因胰臟癌逝世，其親友昨日於沙田寶福紀念館，以佛教儀式為他設靈，今日舉行大殮儀式後，其遺體運往大圍富山火葬場進行火化。錢國偉生前人緣極佳，門外早已放滿花牌，致送者包括郭富城、張學友、張智霖夫婦、吳卓羲、佘詩曼、蔡卓妍及鍾欣潼等，場內圈中好友致送的花牌則有楊受成、古天樂、周星馳、陳慧琳及張家輝等。而唐詩詠、許志安、張衞健、蘇永康、阮兆祥、康子妮及樂易玲等親自到場致祭。

「佢一生好充實」

靈堂以白色布置為主，橫匾寫上「往生淨土」，遺照中的錢國偉以雙手托頭、面帶微笑，靈堂中間擺放了太太陳宛蔚及女兒送的心形花籃，而大會有派發紀念冊。錢國偉生前好友鄭伊健夫婦、林曉峰、黎芷珊及錢嘉樂等於家屬席幫忙打點。

期間錢嘉樂、林曉峰、黎芷珊等陪同陳宛蔚會見傳媒，陳宛蔚起初心情平復，但之後仍忍不住眼濕濕，她說：「都要去面對，知道老公要做得最好，自己都要秉承佢精神，照顧屋企、自己同個女，要收拾心情。老公係開心嘅，所以呢個係farewell party。（囡囡知爸爸去世？）同佢傾過，佢都有喊住話要搵爸爸。（錢國偉有冇遺憾？）冇，佢一生都好充實。」問到經濟有否問題？她說：「冇錯，佢係屋企經濟支柱，但我都會努力工作，做番嘢，感激大家。」

姚子羚：冇佢我冇今日

此外，憑錢國偉監製的劇集《四葉草》系列出道的姚子羚及唐詩詠相當感觸，子羚哭着說：「冇佢我都冇今日，佢走之前冇同佢好好道別有啲遺憾。」詩詠則說：「喺佢身上我學曉拚搏，佢係我伯樂。」而連詩雅坦言心情很沉重，哽咽說：「第一次拍戲係佢搵我，當時自己唔知做乜，一路拍佢就一路教導我。」蘇永康、許志安及張衞健坦言「BIG FOUR」現時有點成績，作為靈魂人物的錢國偉功不可沒，張衞健說：「我哋加埋佢係BIG FIVE，如果BIG FOUR係四肢同身軀，佢就係大腦。」