鄭裕玲向農夫下「封口令」

藝人鄭裕玲與組合農夫成員陸永、C君主持港姐特備節目，3人大讚佳麗質素不錯，C君搞笑指其實最睇好鄭裕玲！鄭裕玲則化身包青天，向兩位拍檔下「封口令」，擔心影響賽果。

鄭裕玲、陸永及C君前晚現身電視城主持節目《港姐有問題》，對15位準港姐進行智力及常識測試。3位主持事後齊齊受訪，大讚一眾佳麗轉數快兼有記性，且異口同聲表示：「佢哋上至天文地理，下至餐廳餐牌問題都識答，成本餐牌都背得出，證明咗人類真係無極限！」

C君點名謝嘉怡

問到鄭裕玲對哪位佳麗有深刻印象？她明言不欲點名：「個個都唔錯。（留意佢哋啲負面新聞？）冇！我好正面嘅。」陸永即搭訕：「佢係連正面（新聞）都冇睇。」C君則對「海外佳麗」謝嘉怡印象深刻：「佢雖然喺外國長大，但都好努力用中文對答。」又搞笑說：「其實我最睇好Carol（鄭裕玲英文名）。」鄭裕玲即「訓示」二人不要亂噏：「要保持公正，唔想影響觀眾投票。下星期我哋同啲佳麗仲會有一個類似嘅節目。（見工嘛？）我冇講呀！」

佳麗陳楨怡及謝嘉怡孖住受訪，前者透露節目內被考語文、地理和歷史，自覺語文方面較優勝。記者打趣問她為何突然額頭長滿粒粒，她說：「尋晚通宵溫書，準備今日節目錄影，令我諗番起讀大學時捱夜嘅日子。」謝嘉怡則自言本身廣東話欠佳，要在心中將廣東話先翻譯成英文，理解完再用廣東話表達，故反應會比其他佳麗慢。提到將會再淘汰3位佳麗，陳楨怡表示會苦練口才和才藝表演迎戰，而謝嘉怡則坦言很想再晉級，事關剛完成14天隔離參賽，不想太快「被消失」。