鄺潔楹勾搭男友好兄弟 報復出軌賤男

·3 分鐘文章
不甘男友偷食其好姊妹,出招「以牙還牙」報仇!
不甘男友偷食其好姊妹,出招「以牙還牙」報仇!

無綫「白富美」小花鄺潔楹的戀愛史一隻手數得完,最傷最痛是男友「出軌」搭上其好姊妹,迫使她策劃復仇,並鎖定男友的好兄弟作為目標!成功令對方愛上後,一心報復的她秒速飛甩對方,非常殘忍!

現年28歲的鄺潔楹(Judy)既有清純外表,又出身自富裕家庭,想必裙下之臣眾多,但她原來僅拍過四次拖!自言對感情事非常認真的她,可惜遇上渣男「出軌」搭上她的好姊妹,令她晴天霹靂:「嗰時喊咗好耐,有啲抑鬱,仲有諗過報復添!記得晏晝發現佢哋一齊,夜晚就諗到要點復仇,就係搵佢好兄弟!」結果翌日付諸行動,她致電男友的好兄弟訴苦,力數賤男的不是。

一走了之冇解釋:佢應該好憎我

對方出於正義,每日來電送上安慰,未幾真的產生憐憫之心愛上Judy,消息亦很快傳到其前男友耳邊:「我就係想佢鍾意我,報復嘛!佢又真係鍾意咗我!當時男友問我點解要咁做,我咪話佢終於知道我係咩感受啦!我係唔鍾意個男仔,最後都冇同佢交代就飛咗去美國,我諗佢到依家應該都好憎我!(唔同人解釋番?)冇呢份勇氣,好在聽講佢已經結咗婚。(咁男友同你個好姊妹仲有冇一齊?)梗係冇,我都知佢哋唔長久,當然後來男友都有悔過啦!大家都有出嚟見面。」

與圈外男了解中 拖足兩年

經歷幾段情傷後,Judy笑言對愛情仍有憧憬,現時與年長一歲的圈外男仔了解中,大讚對方有上進心,但雙方關係已膠着兩年多,仍未能更進一步:「其實問題喺我度!我好麻煩,上年成日出埠冇乜聯絡,佢有段時間以為我對佢冇興趣,因為我成日搵藉口唔赴約,點知前排撞到又傾番,仲係醞釀緊,呢個時刻仲未一齊,我要肯定對方係真心先得,但我唔會主動問佢,否則佔下風。(唔驚人走埋?)媽咪都有咁講,咁走咗唔係真愛啦!」

問到父母可想她早點出嫁?Judy笑指兩人睇法不一,父親叫她慢慢挑選,母親則較為心急,早年更為她搞相睇:「25歲之前就成日話我唔細,嗰次有出過去,對方家長都在場,氣氛好尷尬,最尾我頂唔順,激動到衝去廁所喊,嚇到媽咪冇再咁做。」

鄺潔楹雖有意中人,但不想主動出擊,白白浪費兩年。
鄺潔楹雖有意中人,但不想主動出擊,白白浪費兩年。
鄺媽媽心急招婿,曾為女兒搞相睇。
鄺媽媽心急招婿,曾為女兒搞相睇。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能