酒店頂層49樓新開維港景色地中海菜 招牌小龍蝦雲吞+ $530/兩位 Afternoon Tea

食飯鍾意食埋個景嘅朋友，最近金鐘呢間酒店於頂層新開一間富有地中海豐沛色彩嘅餐廳。餐廳位於49樓，多塊落地大玻璃，可以飽覽維港景色，雖然係酒店餐廳，但餐廳就希望營造法式小餐館嘅親切氛圍。餐點方面由來自倫敦嘅米芝蓮星級主廚Jun Tanaka掌舵，料理靈感源自法國及意大利沿海嘅美食，以法式料理為基礎，著重於使用時令食材，創作出多款有驚喜嘅美食！

室內裝潢由著名香港建築師André Fu負責，以赤陶橙，泥土酒紅，礦物藍，土灰綠松及琥珀焦糖等豐沛色彩，營造出五個各具個性的空間，令味覺同視覺都得到享受。

醃日本鯖魚 Flamed Saba Mackerel

日本鯖魚先以鹽及醋醃製兩小時，上碟前輕輕火炙，配上清新爽脆嘅青瓜粒、水瓜柳及蒔蘿，能夠平衡鯖魚油香，加上帶有海鹽味嘅海藻，更能帶出鯖魚鮮味。

味噌時令鮮魚 Whole Market Fish

時令鮮魚先以檸檬及味噌醃製24小時，再於烤焗爐中烹煮，帶有淡淡焦香煙燻味，最後伴上酸漬小蘿蔔茴香芹沙律令成道菜更清新。

小龍蝦雲吞 Langoustine Ravioli

以全手製意粉製作成半圓形嘅意式雲吞。餡料包括原隻小龍蝦尾及帶子慕斯，小龍蝦尾以鹽麴醃製過鮮味更突出，經烹煮後加上香濃小龍蝦汁、風乾意大利鮮茄及羅馬青花菜，啖啖都係龍蝦鮮味。

Afternoon Tea （$530/兩位、$290/一位）

餐廳另外都有供應Afternoon Tea，無論價錢定食物質素都好有誠意，$530/兩位連埋景色真係好抵，而且套餐內每一款點心都可以單獨拎出嚟作為一道餐點，好有驚喜。下午茶套餐包括一份松露芝士泡芙、金提子鬆餅以及甜鹹點各四款。

Scone係tea set內其中一個推介，選用法式牛油忌廉及自家製果醬，外層香脆而內部保持濕潤。

而四款鹹點包括炸鴨肉卷、蘑菇酥皮盒、刁草煙三文魚沙律及鹹牛面頰。

甜品方面就有法國芝士熱情果蛋糕、蛋白檸檬泡芙、草莓忌廉撻及榛子小豆寇牛油酥餅。

Salisterra
地址: 金鐘金鐘道88號太古廣場奕居49樓