重提林峯曾被硬捧拎亞太區男歌手被噓 網民：Package不輸姜濤

無綫前總經理陳志雲最近喺個人影片頻道上載影片，重提當年有高層堅持頒發「亞太區最受歡迎男歌手獎」予林峯一事，引發網民喺討論區展開討論，唔少網民認同林峯嘅唱功同演技，話佢成個package唔差，只係畀無綫累死等，仲有網民拎佢同姜濤比較，表示「你望下當年嘅林峯同姜B其實好似」、「林峯當年Package不輸姜B」。

林峯當年出道無耐就得到劇集《尋秦記》飾演秦始皇贏政機會，亦係呢個角色令佢成功得到關注，之後喺唔同劇集都擔任重要角色成為一線小生，2003年更榮獲《萬千星輝賀台慶》「飛躍進步男藝人」，翌年憑《大唐雙龍傳》寇仲一角獲到《萬千星輝賀台慶》「我最喜愛電視角色」。即使宜家林峯久未拍攝無綫劇集，但好多網民都留言話對佢《溏心風暴之家好月圓》管家仔、使徒行者《爆seed》呢啲角色演出好難忘。

除咗拍劇之外，林峯都有推出歌唱作品，包括唔少劇集歌，曾經喺2016年仲開咗連續3場《Heart Attack》紅館演唱會。網民對林峯演唱嘅歌都好有印象，更加將《愛在記憶中找你》、《愛不疚》等歌名一一列出，仲留言話「演唱會唱得好穩喎」、「唱歌有感情」、「雖然唔係頂級但如果用今日標準黎講一定係一線」等，大讚係全能藝人。

不過林峯近年除咗早前釋出電影《尋秦記》首部預吿片成為話題外，觀眾對佢最深嘅印象就只有佢嘅感情生活同埋寵妻（張馨月）行為。好多網民留言大鬧無綫捧死咗林峯。以下綜合咗網民認為當年林峯畀無綫捧死嘅3大死因。

【死因1】主打歌《Chok》太洗腦
林峯2007年加入樂壇，推出唔少情歌都令人朗朗上口，唔少網民就話佢唱歌好有感情。2011年出嘅主打歌《Chok》明明係洗腦歌，但就喺《十大勁歌金曲頒獎典禮禮》憑《Chok》打贏《天梯》拎到金曲金獎，引來好多haters，網民仲話《Chok》根本係侮辱人嘅聽覺。

【死因2】過份Chok樣
雖然唔少人都讚林峯靚仔有型，仲用「Chok」一字形容佢，標籤佢做「Chok峯」、「Chok王」等稱號。但就係因為太Chok嘅關係，當時部份人覺得林峯係刻意扮型，恥笑佢Chok得太誇張。

【死因3】無綫頒發「亞太區最受歡迎男歌手獎」
好多人當年都認同林峯唱歌能夠打動人心，不過就認為佢未夠資格拎2009年十大勁歌金曲頒獎典禮「亞太區最受歡迎男歌手獎」，據知當時現場更有噓聲傳出，就連作曲家陳輝陽當時接受訪問都話：「樂壇已死，由林峯拎金曲金獎開始」。而林峯喺幾年後接受商台訪問嗰陣都話自己拎獎時好唔舒服：「我曾要求頒獎單位唔好頒俾我，人人都覺得我有後台先有獎，我得獎個心好唔舒服，唔想別人覺得我唔係實至名歸！」陳志雲近日就爆料指當時係無綫高層堅持頒發呢個獎畀親生仔林峯，不過佢都覺得林峯未能擔起呢個獎。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！