野人老師丨大寶細寶喊戲獲激讚 Stanley與導演力撐：喊到心都痛埋

ViuTV原創劇《野人老師》正熱播，由MIRROR成員邱士縉（Stanley）、「皮皮」陳瑞輝（Frankie）、鄭丹瑞、談善言和沈殷怡等主演，亦係Stanley和Frankie自MIRROR演唱會意外事件後復出第一擊，播出一周未夠已充斥好評。除咗一班大人演員受注目，劇中一對肥嘟嘟小兄弟大寶（黃啟溢飾）和細寶（林信衡飾）都成為熱話，更被觀眾大讚好戲。

前晚（5日）劇情講述大寶和細寶因受唔住律師媽媽（李敏飾）高壓教導，逃學至坪澳灣時遇到李白（Stanley飾），Stanley將佢哋帶到「大地小學」後，兩兄弟想成為該校學生。當寶媽和寶爸趕到坪澳灣接回大寶細寶，大寶細寶更加唔肯離開，一直待尾班船開走先肯現身，寶媽即時嬲爆，痛罵兩個兒子並要求佢哋向老師道歉；大寶細寶哭成淚人，邊喊邊向寶媽求饒；但到最後，寶媽唔小心毁壞兄弟手工作品，大寶反而大罵寶媽，更要控告對方侵犯其人身自由，獲觀眾激讚：「大、細寶D戲好好，佢哋喊果陣，我都有D心up！」、「啲戲真係冇得頂」、「細寶好可愛，講嘢把聲好BB；大寶演得好好」等等。去到噚晚（6日）嗰集，大寶細寶控告父母，佢哋仲喺大地小學嘅學校法庭互相講出心底話，寶爸寶媽勝訴，不過佢哋都想大寶細寶開心，所以最後選擇報讀大地小學。

大寶細寶亦獲《野人老師》導演陳賢俊於IG限時動態發文大讚，指自己好鍾意「大細寶歷險記」：「大寶喊到我心都痛埋，李白（Stanley飾）同世豪（鄭丹瑞飾）觀星父子情一段我都好鍾意，一家人要互相理解真係唔易，希望野人老師能給你一面鏡，看看自己是否做了劇中人的事。」Stanley仲轉發表示：「佢哋呢條線會更好睇。」據悉，大寶曾拍過廣告、電影《一路瞳行》、劇集《星空下的仁醫》等，有唔少拍攝經驗，但拍攝《野人老師》喊戲並唔容易。導演陳賢俊接受媒體訪問時大爆大寶今年11歲，細寶7歲，今次特別邀請戲劇導師教佢哋，直指大寶嗰場喊戲拍攝時遇上唔少問題，表示大寶試鏡時係做到，但拍攝當日因緊張喊唔出，令大寶嬲自己，越嬲就越緊張，於是拍咗寶媽寶爸嘅戲份先，帶佢哋入戲，佢亦感謝寶爸陳郁憲僅用咗3分鐘帶大寶入戲，喊到眼淚鼻水都流晒。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！