林家棟暖男事件簿 陪契媽夏萍走最後一程 侍母至孝唔考慮結婚

星期日晚香港電影金像獎頒獎禮上,四哥謝賢憑《殺出個黃昏》榮獲香港電影金像獎最佳男主角,由電影嘅監製及編劇林家棟陪伴上台。家棟唔止只係扶實四哥,仲照顧得好周到,四哥致詞時多次想除口罩,但家棟都幫佢帶返,並解釋「人多,醫生叮囑最好唔好」。而四哥未有說話想講時,家棟亦幫手搞氣氛。

呢一幕令唔少網友為之動容,認為家楝近年對香港電影盡心盡力,唔收片酬拍《手捲煙》之外,原來仲好識照顧長輩。查實家楝多年來都有唔少暖男行徑,只係佢為人低調先冇咩人講,睇完應該會另眼相看!

為救小演員受傷入院

家棟上星期拍新片《潛行》一場槍戰戲時,要抱住一名小演員狂跑。由於現場滿布沙石,家棟唔小心跌親,但係為咗保護小演員而受傷,有傳曾經唔郁得,劇組要叫救護車將家棟送院觀察。事發日子只係金像獎前幾日,本來外界以為家棟要休養,點知佢抖夠就立即出席頒獎禮,夠晒尊重大會。

林家棟暖男事件簿 陪契媽夏萍走最後一程 侍母至孝唔考慮結婚
林家棟暖男事件簿 陪契媽夏萍走最後一程 侍母至孝唔考慮結婚
林家棟暖男事件簿 陪契媽夏萍走最後一程 侍母至孝唔考慮結婚
林家棟暖男事件簿 陪契媽夏萍走最後一程 侍母至孝唔考慮結婚

契媽夏萍彌留陪伴在側

家棟喺電視台時認識前輩夏萍(Apple姐),並上契成為契仔。家棟唔止掛個名,仲真係照顧契媽,2015年Apple姐跌親入院後,家棟安排契媽住老人院,經常探望之餘又約一班舊同事同Apple姐食飯,等佢感覺熱鬧氣氛。到契媽病重彌留之際,家棟同Apple姐另一契仔張國強都有陪伴在側,走完最後一程,並幫手打點後事。

為撐劉德華唔肯離巢

2001年,家棟因為電視台有小圈子而打算前途,其時因為萬梓良而認識劉德華,而華仔亦將離巢嘅家棟收歸旗下。不過華仔嘅公司後來因為官司而有麻煩,連帶家棟都受影響,但佢冇考慮走人,仲認為「做兄弟嘅,冇咩幫到手,撐下都得啩?」。

孝順阿媽冇諗過成家

家棟媽媽獨力湊大8個仔女,因此家棟好敬重媽咪,有時間就陪佢去旅行,就連結婚生仔都要過阿媽呢關。到近年家棟受訪時直情話幾姊弟得佢獨身,所以佢會負責照顧媽媽,冇諗過成家。

林家棟暖男事件簿 陪契媽夏萍走最後一程 侍母至孝唔考慮結婚
林家棟暖男事件簿 陪契媽夏萍走最後一程 侍母至孝唔考慮結婚

為長者發聲自資拍《殺出個黃昏》

今屆金像獎家棟一個人同多套作品有關連︰主演《智齒》、《手捲煙》入圍男主角,監製編劇四哥得獎作《殺出個黃昏》;多項提名嘅《梅艷芳》中家棟演梅姐唱片公司高層。家棟轉戰影圈20年,以監製身份催生多套本土味濃嘅小眾作品如《打擂台》、《死開啲啦》,而《殺出個黃昏》更加係家棟有份出錢。訪問時家棟提到由於《殺》起用前輩同新人,唔似有公司會投資,於是自己揞荷包,又認為回唔回本唔緊要,只係希望觀眾睇完會更加關心家中老人家。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能