金像獎2025︳主要獎項預測 《破・地獄》隨時橫掃大獎《九龍城寨之圍城》突圍靠佢？︳電影LOL
第43屆香港電影金像獎將於星期日舉行，咁當然要做2件事 －
數下數字。去年2套票房破億電影分別得到最多提名，收1億6千萬嘅《破・地獄》有18項，係今屆最多。排第2收1億1130萬嘅《九龍城寨之圍城》入圍角逐14項大獎。本屆頒發19項大獎，共有46套上映電影符合入圍資格。大會第一輪評選投票收到1313有效選票，投票率為64.84%，係自2022年第四十屆以來的新高。而今年金像獎的協會成員增至17個，分別有「香港電影副導演會」、「香港影視聲畫製作協會」及「香港電影視覺特效協會」加入。
另一件事。預測賽果。一如往年。
最佳導演
陳茂賢《破・地獄》
鄭保瑞《九龍城寨之圍城》
黃修平《看我今天怎麼説》
楊曜愷《從今以後》
翁子光、區焯文《爸爸》
最佳電影
《九龍城寨之圍城》
《破・地獄》
《爸爸》
《看我今天怎麼説》
《從今以後》
最佳男主角
林峰《九龍城寨之圍城》
許冠文《破・地獄》
游學修《看我今天怎麼説》
劉青雲《爸爸》
郭富城《臨時劫案》
最佳女主角
鍾雪瑩 《看我今天怎麼説》
區嘉雯 《從今以後》
談善言《虎毒不》
衛詩雅 《破・地獄》
許欣怡 《久別重逢》
預測 － 4個獎一齊講，因為相信好大機會都係由 《破・地獄》包辦。早前有網民討論今屆影后誰屬，有意見認為衛詩雅有大公司支持對得獎有優勢，相信會較為佔優。呢點我幾同意，畢竟金像獎由電影行業不同崗位人士投票，你以為唔關事嘅公關人員、戲院管理層甚至幕後人員，佢地好多都係選民。而大公司嘅優勢就係拉票動員力夠。雖然有網民認為金像獎協會主席爾冬陞已經盡量擴大選民基礎，今年仲加多3個幕後工會參與，而且女主角提名已經爆咗冷，但係去到最後階段投票一定不容有失。因此小編相信，上面幾項大獎都好大機會由《破・地獄》奪得。
公平啲講，許冠文、衛詩雅、陳茂賢喺各個界別中，表現絕對唔輸蝕。許冠文演乞人憎老seafood好快就令觀眾入局，呢啲真係功駕。至於影后，競爭激烈到連入圍金馬獎嘅吳君如都居然落馬，因此邊個贏都唔意外，邊個輸都可惜，而且每位女演員都有獨當一面嘅演繹，呢一年嘅女主角名單足以喺香港影史留下一筆印記。陳茂賢處理《破・地獄》多個段落得宜，而且帶到幾位主角走出本身嘅固有印象，難度不比拍《九龍城寨之圍城》低。
最佳男配角
朱柏康 《破・地獄》
秦沛 《破・地獄》
盧鎮業 《虎毒不》
古天樂 《九龍城寨之圍城》
伍允龍 《九龍城寨之圍城》
預測 － 我心水係演典型爸爸嘅小野盧鎮業，但相信業內人士傾向支持近年開始受重用嘅朱柏康。伍允龍係另一熱門﹐要令入行時間唔長唔短位置又唔高唔低嘅伍允龍做到眼前一亮，我相信佢用咗好大努力，表現亦都值得嘉許。
最佳女配角
鄧麗欣《我談的那場戀愛》
谷祖琳《爸爸》
梁雍婷《破・地獄》
韋羅莎《破・地獄》
李琳琳《從今以後》
預測 － 舊年得知李琳琳復出拍《從今以後》仲要係演長者女同志，再見到John哥憑《白日之下》拎男配角，心諗係咪連續兩年見到姜氏伉儷上台？我相信機會頗大，不過琳琳姐喺《從今以後》可以發揮嘅篇幅有限，反觀谷祖琳喺《爸爸》就有更多空間，估計會係小谷跑出。話時話，今屆女配角嘅難tip程度不下於女主角。
最佳新演員
劉偉明《九龍城寨之圍城》
陳卓賢《久別重逢》
蘇文濤《爸爸》
吳祉昊《看我今天怎麼說》
邱彦筒《寄了一整個春天》
預測 － 演戲經驗少之又少嘅蘇文濤要演《爸爸》嘅少年殺人犯，肯接已經有勇氣，做得到算合格，更何況睇得出唔係以「演」嚟令人確信螢幕上嘅少年人唔係冷血邪魔。Marf嘅角色同表現同樣亮眼，今次即使唔得但日後大把世界，香港娛圈好少有齊舞台感跳舞好睇唱live演戲都有潛質嘅表演者了，難怪會有人將Marf同80年代嘅巨星相提並論。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
