金像獎2025︳朱栢康奪最佳男配角激咀駱振偉 得獎前已經係劇帝 與台籍太太婚姻告終

喺尋晚香港電影金像獎，朱栢康憑《破．地獄》入面飾演喃嘸師傅嘅演出奪得最佳男配角，顯得相當激動。頒獎禮後，朱栢康同老友駱振偉嚟個激吻慶祝，令全場嘩然，連佢地身後嘅英皇老闆楊受成博士都好似睇到碌大眼！

朱栢康近年有較多電視及電影演出，令佢更為觀眾認識，但係朱康早喺本地舞台劇界耕耘多年，早幾年更加拎過「劇帝」殊榮！

今年42歲嘅朱栢康成長於小康之家，哥哥朱栢謙同樣係戲劇工作者，而朱父就從事法律相關工作。朱栢康中學時見到哥哥參加學校戲劇活動玩得開心，於是亦開始參與戲劇演出。後來朱栢康考入演藝學院，曾經因父母反對而冷戰，但朱康提到當時爸爸反而好知道佢幾時要交學費，由此可見爸爸其實口硬心軟。

畢業後朱栢康參加過不同戲劇團體演出，並且同哥哥朱謙、白只、楊偉倫同埋陳文進組成樂隊朱凌凌。朱栢康喺劇場工作數年後，面對30歲關口時考慮過放棄，甚至打算考消防員，但爸爸反而叫佢再試下先。朱栢康2017年開始接拍影視作品，包括ViuTV劇《打天下》、《黑市》等。2019年朱栢康憑劇場演出《拼死為出位》獲得第28屆香港舞台劇獎「最佳男主角(喜/鬧劇)，而同一年上映嘅電影《金都》入面，朱栢康飾演Stephy男友一角，就獲得翌年台灣金馬獎最佳男主角提名。

感情方面，朱栢康幾年前同台灣女友結婚，更一度住喺台灣，但二人終因性格不合而離婚。過去朱康承認過，曾經喺某段關係中做錯事，但當時女友原諒佢，不過最終都係分手收場。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！