金剛自爆高峰期月賺幾十萬 曾計劃25歲結婚 現盼早日成家立室

金剛
金剛

現年41歲嘅金剛(李信樵)喺2017年約滿離巢TVB,並回到台灣生活和發展,早前金剛選擇前往內地發展,除咗拍攝飲食節目之外,佢最近仲同內地網紅王若龍Terence,大談以往嘅事業及感情狀況,期間自爆喺高峰時可月賺幾十萬、喜歡身材好好嘅女仔,及喺25歲時已經有結婚嘅打算,不過可惜去到而家都未能實現。

唔經唔覺入行20年嘅金剛,2002年喺台灣出道,2007年簽約TVB赴港發展,參與唔少綜藝節目及劇集拍攝,當中憑《獎門人》任「獎老」打開知名度。2017年佢約滿離巢TVB,選擇回到台灣生活和發展,並陪伴屋企人,原因係「因為屋企人喺台灣,就覺得呢10年唔喺佢哋身邊好似缺少咗啲嘢,爸爸媽媽年紀慢慢大,我個妹嘅兩個小朋友都大個咗,但係我發覺佢哋嘅童年冇我嘅存在。」

金剛喺香港發展不俗,佢直言高峰期試過月賺幾十萬,但係當時佢覺得錢好容易賺,所以洗錢亦好快,例如請朋友食幾千蚊嘅宵夜都唔會覺得肉痛。而家嘅金剛回想起就覺得自己好蠢,將錢洗喺呢啲地方,並話食完宵夜,呢啲朋友都唔知去咗邊。

被問到回到台灣嘅工作及生活上嘅轉變時,金剛就話工作量大減,因為長時間冇喺台灣發展,好多人已經唔認得佢,所以唯有「食老本」,並將所有名牌衣服變賣,生活回歸平淡嘅金剛,而家已經唔會買名牌衣服。談及當時喺墾丁生活,金剛表示好享受,因為佢好鍾意海邊、陽光海灘同埋比堅尼美女。另外,佢又與前女友小嫻擺攤賣雞翼,情侶檔拍住上搵真銀。

至於金剛嘅感情生活,被指以往女朋友都係身材驕人,金剛直認喜歡身材好嘅女仔,並笑稱因為自己手好大。被問到想唔想結婚生小朋友,金剛就表示自己想結婚生小朋友,仲曾計劃喺25歲結婚,但發現唔可行,之後就推遲去到28歲及35歲,不過都係唔可行,而家嘅佢就只好順其自然,希望盡早成家立室,完成佢嘅願望。

最後金剛表示自己將會長駐廣州發展,下個月除咗飲食節目播出之外,佢仲喺順德舉行棟篤笑,呼籲大家多多支持。唔少內地網民睇完訪問後,紛紛留言支持佢及叫佢加油。

王若龍 抖音影片截圖
王若龍 抖音影片截圖
王若龍 抖音影片截圖
王若龍 抖音影片截圖
王若龍 抖音影片截圖
王若龍 抖音影片截圖
王若龍 抖音影片截圖
王若龍 抖音影片截圖
王若龍 抖音影片截圖
王若龍 抖音影片截圖
金剛
金剛
金剛
金剛
金剛 & 小嫻
金剛 & 小嫻
金剛
金剛
金剛
金剛

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!