金宵大廈2｜胡鴻鈞戀連詩雅網民感心寒 黃婉華驚喜現身 網民：「姐姐」前傳定後續？

TVB劇集《金宵大廈2》第9單元「嫁衣」講述裁縫店小程師傅（胡鴻鈞飾）對Florence（連詩雅飾）一見鍾情，用盡方法令連詩雅與未婚夫Dave分手嘅瘋狂迷戀故事；劇情就被網民狂讚，仲話係最恐怖嘅單元。不過，最令網民意想不到嘅就係早前喺單元「姐姐」飾演菲傭Louisa嘅黃婉華再次聯同劇中父母樊亦敏及黃子雄出場，令人懷疑到底個故事時間軸係咪發生於Lulu（樊亦敏及黃子雄女兒）未死之前。

劇中，胡鴻鈞積極揭發連詩雅男友Dave搵出租女友一事，引發佢哋分手，從而乘虛而入奪走女神芳心；連詩雅將胡鴻鈞家傳之寶大紅嫁衣著上身後就發生一連串怪事，又發現到胡鴻鈞係個控制狂，最後胡鴻鈞用剪刀桶傷被人偶化身嘅連詩雅，亦發現可以救到連詩雅嘅方法就係永遠留喺人偶身邊。其實胡鴻鈞喺開拍前，專程向專業裁縫師傅學習車衫、整花鈕、穿針引線既技巧，為嘅就係希望扮演得更神似；網民又指胡鴻鈞今次演繹到位：「胡鴻鈞演的變態裁縫演得很好，演技進步值得一讚，令人看著心寒」、「眼神動作真係演得恰到好處，變態得來又深情」、「微表情好到位，一個眼神都嚇死你」等等。

另外劇中亦講述黃婉華與樊亦敏及黃子雄去搵胡鴻鈞造衫，令網民好奇到底黃婉華係扮演緊Lulu定Louisa，又指Lulu死前就係胡鴻鈞幫佢做嫁衣，紛紛討論到底「嫁衣」係單元「姐姐」前傳定後續：「時間點應該係真lulu未死之前」、「跟時序的話，應該真係娶姐姐做老婆」、「睇嘅時候諗緊呢個lulu係原裝果個定新Lulu」、「估唔到會連返姐姐嗰單元，似乎姐姐已經完全變Lulu仲要嫁俾阿邦」、「係姐姐啦，吳氏夫婦想姐姐完全變做佢個女Lulu，所以都要同原本個女一樣去小程間鋪頭做旗袍，嫁同一個男人」等等。而「嫁衣」播映完畢後，網民都大讚好睇，留言：「小程同公仔成婚嗰度真係有啲毛管戙」、「終於有上一輯嘅感覺」、「突然覺得係最好睇既單元」、「呢個單元應該係收得最好」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！