金宵大廈2|蔡嘉欣空肚出演吃播主 再聯同陳詩欣曬Hermès手袋直認拜金KOL
無綫劇集《金宵大廈2》上周五(22日)播出第八單元「吃播」,故事以網絡世界為主,有別過往靈異單元,不過唔少網民就話劇情詭異懸疑,仲恐怖過平日啲單元;其中就以吃播主Jessica F飲完一啖湯後吐出疑似人類牙齒一幕最為嘔心,而原來劇中一直蒙眼嘅Jessica F就係由蔡嘉欣飾演。
單元〈吃播〉故事疑似影射2019年外國「Kate Yup事件」,講述點餐平台外送員阿甘(丁子朗飾)認定Jessica F(蔡嘉欣飾)被威迫蒙眼吃播,並發出求救訊號,於是聯同彈彈珠(阮兒飾)、湯貴祥(白彪飾)及其他網民進行救援行動。其實節目一直無公開過呢個單元嘅全員名單,直至播出當日嘅記者會,蔡嘉欣就公開自己係吃播主嘅身分;又表示每次都會空肚去拍攝,因為真係由朝食到晚,試過最誇張係要食全隻油雞,飽到返屋企完全唔洗食飯。
蔡嘉欣入行前其實係一名KOL,又有經營女裝店,形象一向敢言率直,不過就是非多多,就連佢自己落選2019年香港小姐競選後都表示自己並非傳統港姐性格;蔡嘉欣加入無綫後雖獲力捧拍劇及主持《姊妹淘》,但拜金及中意炫富等負評不斷,曾拍攝YouTube影片介紹屋企裝潢,令擺滿名牌手袋嘅櫃曝光,又曾與陳詩欣拍片分享Hermès手袋收藏及配貨,被網民攻擊拜金;日前佢又再度搵嚟陳詩欣展示自己嘅Birkin 25系列,仲自稱係拜金KOL:「一睇呢個陣容就知我哋呢個拜金組合又come back喇!我哋而家已經變成呢個拜金嘅NO.1指標,拜金KOL!」,二人坦言佢哋擁有嘅手袋款炒價已逾20萬,保值度高,仲笑言買袋分分鐘係「致富之道」。
其實蔡嘉欣予人形象一向拜金,有傳因識到有錢iBanker男友Derek而拋棄無綫藝人前男友吳子沖,不過,蔡嘉欣就曾澄清自己當年係被分手,係失戀後與朋友到clubbing認識到男友,又指男友從來無做過ibank。蔡嘉欣又曾喺《姊妹淘》分享,每年生日男友都會寫張5位數支票畀佢買自己中意嘅嘢,另外蔡嘉欣係美容保健品代理,曾經就喺IG限時動態分享手持40萬現金嘅照片,即使事後解釋係安排海外匯款,但一班網民仍認為蔡嘉欣係借機會炫富。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!