金宵大廈2|郭子豪受力捧兩線劇集都有份 Package正到犯晒規

·4 分鐘文章
郭子豪
郭子豪

30歲嘅郭子豪(Arnold)近年備受無綫力捧,有唔少演出機會,好似最近熱播嘅《金宵大廈2》及《食腦喪B》都有佢嘅演出,分別喺劇中飾演韓星Kim及喪B好友古德明。

《金宵大廈2》單元「OPPA」由郭子豪及湯洛雯主演,講述黎倩儀(湯洛雯)係一個追星族,一直都好鍾意韓星Kim(郭子豪飾),更將Kim嘅人形紙板帶返屋企。有一晚一道彗星劃破夜空,人形紙板Kim竟然變咗真人,倩儀更呃住Kim話拍緊偶像同粉絲真人騷,要一齊相處一段時間,令佢哋可以共渡甜蜜時光。之後,更發生有其他粉絲想佔有Kim及發生一連串奇怪事。而由何廣沛及江嘉敏主演嘅《食腦喪B》,劇情主要講述廢青「喪B」余陽光(何廣沛飾)喺澳洲工作假期返回香港,但身體出現突然異變。變成不死身嘅喪B,只係想食人腦,喺好朋友法醫古德明(郭子豪飾)及道士華倫(方紹聰飾)嘅幫助下搵腦醫肚,而喪B喺食腦後都會擁有死者生前記憶及特殊技能。《金宵大廈2》及《食腦喪B》同時期推出,而佢亦演出居份量嘅角色,成功獲得網民關注及留言大讚佢演技有進步。

郭子豪中小學就讀名校喇沙,並畢業於世界知名學府倫敦帝國學院(Imperial College London),名副其實係一名高材生。Arnold家境不俗,爸爸經營時裝貿易生意,父母住喺大埔豪宅,而佢就想要私人空間,所以就以月租約三萬五租住附近嘅屋苑,平時出入都有值80萬嘅名車代步。除咗大隻又靚仔之外,仲係高材生及嚟自富裕家庭,呢個package真係不得了。

郭子豪喺加入娛樂圈前,曾經做過名車公司實習生,並喺21歲時獲美國時裝品牌選為香港代表,成為呢個品牌百年嚟第一次選用華人面孔,除咗做過廣告男模之外,佢亦係呢個品牌世界巡迴宣傳嘅模特兒之一。Arnold喺14年加入娛樂圈,讀完藝員訓練班後,簽約成為無綫「親生仔」, 多年嚟佢有唔少演出機會,除咗《金宵大廈2》及《食腦喪B》之外,仲有《親親我好媽》Hugo連國佳、《三個女人一個「因」》Dominic、《跳躍生命線》「六號」陸昊然、《星空下的仁醫》Larry及《十月初五的月光》金勝等等。而家嘅郭子豪好似發展得唔錯,其實佢喺19年曾涉酒後駕駛被捕,最終被判社會服務令90小時、停牌一年,給自費上駕駛改進課程。 有傳事件令TVB高層不滿,因而被公司雪藏約一年先獲得解凍,之後先再獲得無綫重用。

另外,郭子豪操得一身健美肌肉,其實佢曾經參加《2018 PCA PRO 及香港健美及運動體適能錦標賽》,並奪得「第一屆華南地區男子運動模特組別冠軍」。當時佢為咗參加比賽,決心向公司請假八個月,停工期間要控制飲食、增磅及操肌,成功練出47吋胸肌,體內脂肪比例僅得3%,成功贏出比賽。

至於感情方面,郭子豪喺19年被爆出疑似一腳踏兩船,背著拍拖三年嘅圈外女友Karen與港姐亞軍鄧卓殷(Amber)暗中撻著,雖然當時二人否認戀情,男方仲話與女友Karen已經分咗手。去到2020年7月,郭子豪突然公開認愛,仲話好感激Amber喺停工及低潮時支持佢,並大讚女方係佢見過最善良嘅人。

《金宵大廈2》劇照
《金宵大廈2》劇照
郭子豪飾演韓星Kim
郭子豪飾演韓星Kim
《金宵大廈2》劇照
《金宵大廈2》劇照
《金宵大廈2》劇照
《金宵大廈2》劇照
《食腦喪B》劇照
《食腦喪B》劇照
《食腦喪B》劇照
《食腦喪B》劇照
《食腦喪B》劇照
《食腦喪B》劇照
《十月初五的月光》劇照
《十月初五的月光》劇照
《星空下的仁醫》劇照
《星空下的仁醫》劇照
郭子豪
郭子豪
郭子豪
郭子豪
郭子豪
郭子豪

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!