金球獎下週一舉行 《艾蜜莉在巴黎》驚爆賄賂疑雲

《第78屆金球獎》（78th Golden Globe Awards）將於香港時間下周一（1/3）上午舉行，入圍名單亦已經喺早前公佈，Netflix人氣劇集《艾蜜莉在巴黎》（Emily in Paris）獲得2項提名，而莉莉哥連斯（Lily Collins）更憑劇集首次入圍角逐音樂及喜劇組最佳女主角，不過當時就已經被外國傳媒及網民認為佢喺劇中表現平平，仲未夠班角逐女主角，最新就連劇集都驚爆賄賂疑雲！

據外國傳媒指入圍最佳音樂及喜劇組別最佳劇集嘅《Emily In Paris》，劇組喺2019年拍攝時曾邀請超過30位有份喺金球獎提名與投票嘅荷里活外國記者協會成員豪遊巴黎，包括入住每晚房租高達1,400元美金（約港幣1萬元）嘅巴黎5星級酒店，之後又邀請佢哋去美術館舉行記者會與午餐會，有参與人曾形容自己好似受到「皇帝皇后式」招待。報道指《Emily In Paris》監製以呢種特別方法去動搖投票者，成員可能會受到利益輸送影響，因為所有成員唔可以接受125美元以上嘅禮品。消息傳出後，劇組方面就否認曾為HFPA會員安排巴黎遊，仲話所有人都係入住團體價錢嘅酒店房。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！