【銅鑼灣美食】銅鑼灣新開抵食Omakase 日本新鮮空運食材 第二位半價

以日本為第二鄉下嘅香港人,呢幾個月都冇得回鄉,思鄉病頻頻發作?銅鑼灣有間新開嘅日本餐廳,主力做廚師發辦,拖羅、海膽等多款刺身由北海道、九州、福岡等地每日空運送到,Lunch有三款選擇,每款都會有沙律、茶碗蒸、壽司、濃湯烏冬同甜品。其中,中價嗰款就會有12件壽司。呢度嘅壽司全部採用赤醋米製作,而且飯量少,一口size就食得晒,啱啱好。不過壽司同刺身都會根據時令返貨,未必每次都係呢幾款呢~

鱆紅魚,深海池魚
鱆紅魚,深海池魚

12件壽司經過師傅精心設計,由淡到濃,逐件逐件咁上。首先登場嘅係鱆紅魚,撒上柚子胡椒令較清淡嘅魚味中帶有微辣,口感煙韌。深海池魚則加上柚子皮,魚味比上款濃郁少少,小清新。

赤貝,伊佐木
赤貝,伊佐木

厚肉嘅赤貝,師傅會拍一拍啲肉,使之收縮,然後就上枱。呢道要即食呢,咁先至食到最爽口嘅口感。輕輕燒過層皮嘅伊佐木,加入岩鹽、芽葱、姜汁、檸檬汁調味,又幾香口。

北海道銀鱈魚,中拖羅
北海道銀鱈魚,中拖羅

平時多時係熟食料理嘅北海道銀鱈魚,變咗做刺身壽司食材後,口感有別於平時,肉質鮮甜爽口,富油脂香。燒過嘅魚肉再放上三升漬,魚油特香。中拖羅則肉質細緻。

牡丹蝦
牡丹蝦

12款壽司中,最吸引嘅一定係牡丹蝦,除咗大大隻賣相夠晒吸睛之外,師傅仲會刮晒啲蝦膏出嚟,再用火槍燒一燒,又香又爽,好滿足。

鯖魚、醬油漬吞拿魚
鯖魚、醬油漬吞拿魚
北海道馬糞海膽亦係重點之一,好rich好甜身呢。
北海道馬糞海膽亦係重點之一,好rich好甜身呢。
三文魚子、大拖羅
三文魚子、大拖羅

至於晚巿時段,一個套餐則包括有前菜、刺身、壽司、和食料理、湯品同甜品。

桃取生蠔,愛女魚肉
桃取生蠔,愛女魚肉

嚟自三重縣嘅桃取生蠔,好清爽,亦有陣陣鹹香海水味,師傅更特意加入自製酸汁啫喱,食更清新。較少見嘅愛女魚肉質彈牙,建議可以捲埋芽蔥一齊食,增加口感。

蟹道樂
蟹道樂

蟹道樂係為前菜,非常豐富。蟹蓋內,混埋咗松葉蟹嘅蟹肉、蟹膏、海膽,仲有三文魚子,啖啖都有香濃嘅膏鮮味。

 鯛魚濃湯、柚子麵豉燒銀鱈魚配栗子蓉
鯛魚濃湯、柚子麵豉燒銀鱈魚配栗子蓉

而家新開業仲有優惠,二人同行第二位有半價!三人以上則有正價75折,除返開大約300零蚊就食到個Omakase lunch啦~晚巿都唔需要$1000!

鮨三川
地址:銅鑼灣渣甸街50號渣甸中心6樓

文:Kar
相、片:Calvin Kwok