雅虎香港新聞 【銅鑼灣美食】法國菜破天荒登陸登龍街 $680食米芝蓮餐廳大廚6道菜餐單
登龍街一向都是銅鑼灣美食區之一，更是麵食天堂，有拉麵、車仔麵、中式麵檔⋯⋯但最近空氣中竟揚起一陣法式風情，並不是Emily in Hong Kong，而是曾到南法米芝蓮餐廳工作的Chef Jeff Chan大膽地在銅鑼灣登龍街開了間只有二十人的法國菜小餐館，製作起他心目中的法國美食。
【立即讚好】全新 Yahoo Food Facebook 專頁
米芝蓮餐廳Amber開店功臣 曾到法國受訓一年
雖然Jeff看起來十分年輕，但其實他有多年烹調法國菜的經驗，更是米芝蓮法國餐廳Amber的開店功臣，「我喺Amber待了5年，當時同香港最厲害嘅廚師共事，覺得自己水平都Ok，點知去到南法，嘩，真係天外有天。」他笑說。
2008年，他去到南法米芝蓮二星餐廳Le Jardin Des Sens總店受訓一年，「當人人都以為法國人好懶，但真正同佢哋做事時，就發現除了喺煮菜方面有天份，每個人都努力得不得了。」當時他每天與法國廚師由早上7點工作至凌晨1點，「原來我哋喺香港算是好舒服，會有清潔姐姐幫手，但喺法國時得總廚跟主廚可以早走，其他人都要將廚房清潔到反晒光先走得。」他笑言，當他已經覺得累得不得了，他的法國同事依然活力十足，「佢哋好似唔洗瞓咁，哈哈。」
南法滋味配搭港式想法 $680食6道美食
「南法嘅食物好多配搭都意想不到，好似他他會加入茄汁，而唔係平日嘅蛋黄醬。另外佢哋都會食好多動物內臟或者野味，但未必每個香港人都接受到。」Jeff說，所以他的餐單就融合港人思維跟法國菜技巧，「我唔會全部都做經典嘅法國菜，好似你會喺Menu見到立麟燒甘鯛魚配龍蝦汁，甘鯛魚本身係日本魚，我希望可以喺法國菜中加入亞洲元素。」佢表示由於自己是華人，將來有機會亦會嘗試在菜式中加入中式元素。
除了亞洲元素的法國菜，Jeff亦選用了不少較少見的法國食材，好像午市限定的法國夏洛萊牛肉漢堡配鵝油炸薯條，他就選用了法國其中一個專門盛產牛的地區，夏洛萊（Charolais）的牛肉製成漢堡，「乜漢堡唔係美國嘢嚟嘅咩？」未等我發問，Jeff已經笑着解釋，「我比以前個法國老細試，佢都耍手擰頭，但我話牛肉同芝士都係法國貨，他他醬又係我自製，點解唔可以話係法式漢堡？」結果法國老細一嚐之下，亦馬上認同了這個新穎的法式漢堡。
Jeff以往都是做些高檔的Fine Dinning餐廳，人均動輒二、三千元，但現在餐廳六道菜只是$680，為何會決定在銅鑼灣登龍街開店？「店名叫Les Papilles，法文指味蕾，我希望用我嘅味蕾製作出嚟嘅嘢食分享比客人，即使喺法式小酒館都可以食到Fine Dinning質素嘅美食。而我會選擇登龍街，就係因為呢邊比較少法國菜嘅餐廳，想比啲新意大家。」法國菜向來都給人貴價跟正式的感覺，Jeff希望一改大家的固有印象，讓大家在熱鬧的銅鑼灣登龍街好好享受一餐輕鬆的法國菜。
全新訂座平台「Yahoo訂餐廳×Openrice」正式上線！
Les Papilles
地址：銅鑼灣登龍街44號登輝大廈地下（地圖按此）
電話：3114 2389
營業時間：12:00nn-11:30pm
更多銅鑼灣美食推介
【銅鑼灣美食】最平$18/件爆餡腐皮壽司！泡菜三文魚+鰻魚玉子燒+黑松露炒蛋
【銅鑼灣美食】4間酸辣粉比拼：香港酸辣粉始祖都輸！冠軍竟然係……
【銅鑼灣美食】銅鑼灣茶飲店苦撐貴租 台籍店主：一定要保持正面
【銅鑼灣Cafe】電競女神Rose Ma開女僕café！$88蛋包飯+女僕畫公仔
【蘋果批比拼】日本2大過江龍蘋果批：144層酥皮vs 熱辣辣吉士醬
【米芝蓮2020】拉麵Jo至今從未落榜！日籍店主：做好拉麵最緊要
