掛念日本 銅鑼灣兩大新派和式料理

日本菜幾時都係最受港人歡迎,今次介紹兩間日本料理,都係位於飯局旺區——銅鑼灣,食材同樣新鮮、食物賣相精緻。一間大膽嘗試新舊融合,一間則著重食材配搭,各有特色。

華鳥風月(銅鑼灣)

佔地兩層嘅新派日式居酒屋及酒吧,上層係餐廳,設計簡約更顯空間感;下層則係chill chill酒吧。餐廳主力供應糅合傳統同新派和式料理精萃嘅菜單,有Omakase亦可單點。刺身、壽司都係每日新鮮空運到港,另外亦有日式串燒、爐端燒、肉食等多種料理。

鹿兒島A4和牛海膽卷

每間餐廳總要有返幾道招牌菜作招徠,呢度就有集合多種人氣食材嘅鹿兒島A4和牛海膽卷。以A4和牛包住鱈場蟹肉,頂層再放上日本海膽同魚子醬,一啖放入口,同時感受到牛香、甘甜同creamy等多種口感同味道,層次豐富。

海膽松葉蟹肉拖羅他他

賣相精緻嘅海膽松葉蟹肉拖羅他他 ,打完卡後就要自己動手食喇。拎起紫菜,嗶埋海膽、烏魚子、帆立貝、松葉蟹肉,重有拖羅他他落去,包住嚟食,鮮味油香同時爆發得嚟,亦有紫菜脆身嘅口感,係享受啊。

辣味噌飯糰

唔好睇輕呢道飯糰,燒烘嘅時間控制好重要,燒得太耐就會變得乾硬,而家控制住喺8至10分鐘內,則可保持外脆口感,重有微微飯焦。飯糰有幾款口味,明太子鹹香creamy,辣味噌則微微帶辣,同樣惹味。

串燒

串燒可以話係嚟到必食嘅item,特別推介虎蝦雞皮串,大大隻,以雞皮包住虎蝦燒,又係考驗師傅時間控制嘅功力,雞皮燒到啱啱好脆卜卜,咇晒啲雞油出嚟,而入面嘅蝦肉又唔會過老,保持彈牙,中間更有一片紫蘇葉作中和。另外阿波尾雞翼亦值得一試,外皮脆口,肉味濃郁;而白鱔亦燒得彈牙可口。

爐端燒燒澳洲和牛牛腹芯

爐端燒係餐廳嘅賣點之一,呢道菜絕對係牛魔王之選。牛腹芯嘅牛味較濃,燒過後就肉香更加突出,而且肉色粉嫩,賣相相當靚仔。

山女魚 (銅鑼灣)

喺人人掛住飛日本嘅時間,高級廚師發辦變得特別吸引,至少可以食得到時令同新鮮嘅日本菜式,借住味覺去咗趟小旅行先。銅鑼灣呢間日本料理,既有Omakase,亦有壽司同鐵板燒等供應,最貼心係連素食Omakase都有。

北海道根室海膽 土佐啫喱

作為前菜,先聲奪人好重要。師傅特意選用色澤光鮮而味道又甘甜嘅北海道根室海膽,配搭自家調製嘅土佐啫喱,酸酸甜甜,又涼涼地咁,夠晒醒胃。面頭仲要加上金箔,添加幾分奢華感。

千草鯖魚配昆布

以白菊醋漬過嘅鯖魚,多咗重酸味,配搭埋石室昆布同埋sake,層次變化更豐富。

刺身三點

拍攝當日,三款刺身分別係石門鯛、深海池魚同大拖羅。師傅對每款刺身嘅切法、食材配搭都好講究。好似石門鯛咁就要薄切,再加蔥花同酸汁等,感覺更爽身;肉質鮮嫩肥美、油脂濃香嘅深海池魚,則配搭魚肝醬同七色芝麻,使之更加香口濃郁;而大拖羅則加芥末籽去突出油香。

壽司

壽司同樣有三款:赤貝、鰆魚同埋赤牡丹。橙紅色嘅赤貝肉質爽脆,配搭柚子皮有種清新感;鰆魚口感柔軟,肉香帶有回甘,而赤牡丹仲會連埋燒蝦頭膏一齊出添,大滿足。

抹茶牛奶布丁

抹茶牛奶布丁
抹茶牛奶布丁

甜品絕對能為一餐飯帶嚟完美嘅ending,師傅選用北海道利尻抹茶粉製作抹茶牛奶布丁,先炒香椰絲至金黃色後,再加入奶同忌廉。最後成品有兩層顏色,上綠下白,靚仔之餘,茶香亦濃郁帶甘,配搭布丁可以喺苦中感受一點甜。

心動不如行動!有興趣就快啲約埋三五知己去嘆下美食!快啲bookmark定啦!

*以上圖片只供參考,所有食品以實物為準. 食品供應因餐廳而異

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能