鏡粉須知!盤點全港10大MIRROR打卡餐廳(姜濤誕更新)

·5 分鐘文章

「今天你走進我生活時 原來日子裡面 唯獨你閃閃發光」*,MIRROR的確喺呢幾年入面,走進咗好多人嘅生活,鏡粉們經常都會出動,去唔同地方打卡。除咗各大廣告牌或粉絲們自發嘅感援活動外,亦有唔少餐廳都自設MIRROR角落。望住12子食飯,食都食得開心啲。今個月底更係姜濤誕,參與應援嘅餐廳就仲多!以下呢10間餐廳,你哋又去咗未先?

旺角 八〇

圖:LamL、餐廳Facebook
圖:LamL、餐廳Facebook

由3位八十後主理嘅café,一直以匯集香港人成長回憶為宗旨,時代新星姜濤生日,當然亦係建構大眾回憶嘅一部分啦。為咗慶祝姜濤誕,餐廳唔止貼滿姜濤嘅靚相,更喺21/4-13/5期間特設以蜜桃為主題嘅姜man餐,包括有桃桃乳酪沙冰、桃桃芝士蛋糕同焦糖蜜桃x 燒春雞,每日限量供應100份,姜糖想試到記得要早啲去。

銅鑼灣 Tsuzuku

 圖:foodxgoodwest_hk、餐廳Facebook
圖:foodxgoodwest_hk、餐廳Facebook

銅鑼灣素有姜濤灣之稱,區內嘅餐廳可以話係有主場之利。呢間日系復古café平時已經吸引咗唔少人去打卡,加上今次姜濤誕,佢哋更表示打卡不設強制消費,相信就會更加人頭湧湧。除咗多個打卡角落,餐廳更設計咗9款明信片免費派發呢!特別推介呢度嘅焙茶蕨餅蛋糕卷同牛油果蟹肉蛋沙律竹炭吐司,前者香甜,後者清新。

天后 陪著你走甜品

圖:weisikmuimui
圖:weisikmuimui

成間甜品舖都貼滿晒姜濤,無論坐喺邊個角落都總有位置可以打卡,就算未食甜品都夠晒甜了。餐廳平時最出名嘅就係焦糖燉蛋同芋圓甜品,今次就特別設計咗幾款薑味或桃味嘅甜品畀大家賀壽,姜誕期間限定甜品包括雙桃3.6牛乳燉蛋白、夠姜桃膠、姜糖綿綿冰同姜啤蜜桃特飲。

觀塘/銅鑼灣 花斑茶社

 圖:lam nancy 102018、花斑茶社 銅鑼灣店(fb)
圖:lam nancy 102018、花斑茶社 銅鑼灣店(fb)

有多間分店嘅台式茶飲店,每間分店耐唔耐都會有啲主題應援或打卡店,早前黃埔新店3面牆都貼滿教主嘅相,今次姜濤誕就輪到觀塘、銅鑼灣等店接力應援,除咗必然嘅裝飾打卡位外,更有「薑糖」義賣活動,所有義賣收益不扣除成本將全數撥入「助學改變未來服務」。除咗珍奶之外,亦推介白桃烏龍同宇治抹茶紅豆鮮奶,前者清新微甜仲有桃肉果粒;後者則香滑甘甜。

屯門新墟 Thre3 concept

圖:Fan Fan Tang、VenusChan2522
圖:Fan Fan Tang、VenusChan2522

呢間餐廳兩間分店都喺屯門,但係新墟嗰間先有咁大個MIRROR corner㗎,仲有啲手牌可以拎嚟打卡,時不時更有應援派𠻹,各位鏡粉去到記住要保持冷靜啊。推介佢哋嘅雞翼三重奏,3款口味包括柚子檸檬、水牛城同玫瑰,juicy又入味。另外,漢堡大大份都好抵食,芝牛堡又係好juicy,有肉汁流出,蛋又流心,好好食不過係會食得有少少論盡囉哈哈。

太子 食包

圖:慕容有兒
圖:慕容有兒

主打外賣漢堡嘅少店,堂食有少量座位,呢度雖然冇齊12子,但就有塊大大塊嘅姜Man IG打卡牌,都幾靚㗎真心,姜糖們自己埋位啦。招牌有WB手打牛王漢堡,肉味香濃又有肉汁,麵包鬆軟,60零蚊性價比唔錯。呢排有期間限定選擇,韓式辣醬蝦堡,炸蝦餅彈牙脆口,仲夾咗塊新鮮菠蘿,酸甜香辣都平衡得幾好。

尖沙咀 煲底

 圖:annie_thm、feiching_cp
圖:annie_thm、feiching_cp

主打海鮮火鍋嘅邊爐店,牆身貼有唔同MIRROR成員嘅海報同手幅,甚至有打卡牌可以拎上手慢慢影。餐廳而家另外有做分區團購,未落到舖頭食嘅話都可以考慮叫返屋企食先。如果係芫荽控,可以揀芫荽海鮮鍋,再叫埋芫荽蝦餃,夠晒荽呀!海鮮湯底都幾足料,有卜卜蜆、又有蟹、蝦、花甲等,鮮味十足。牛魔王揀料時記得揀潮牛set,有多款唔同部位選擇。

尖沙咀 CURATOR Art & Café

圖:magic_yan、Joannekwok
圖:magic_yan、Joannekwok

總唔能夠少咗呢間可以將12子個樣印落咖啡度嘅呢間藝術café,相信好多鏡粉一早已經mark低咗佢。不過之前成日都要大排長龍,可能你仲未去朝聖。只要揀好一張本命嘅靚仔相,send畀店員,就可以擁有杯個人專屬嘅飲品喇,唔飲咖啡嘅朋友,凍朱古力都得。一杯在手,慢慢任得你點打卡都得。食物方面,沙律、大蝦意粉等都係唔錯選擇,但Tiramisu絕對係推介,軟滑香甜,酒香十足。

大埔 溏串小町

 圖:samanfaho、餐廳Facebook
圖:samanfaho、餐廳Facebook

呢間居酒屋都可以印製12子嘅專屬甜品呀,只要預早訂定,用餐時就可以有自訂自肥甜品啦,最啱同鏡粉慶祝生日時,送個surprise畀佢哋。不過由於疫情關係,餐廳3月暫時停業,鏡粉們bookmark咗先,等4月啦。呢度嘅牛肉壽喜鍋調味唔錯,幾清甜,加埋烏冬索湯仲正。另外亦有多款串燒,好似燒白鱔、粟米等供應。

元朗洪水橋 不見不散

圖:or#Tm66405180、餐廳Facebook
圖:or#Tm66405180、餐廳Facebook

老闆應該都係鏡粉,餐廳內唔止有打卡位,老闆仲會親自製作應援小物。呢排叫餐更有Ian、Edan、同姜Man嘅手幅/小卡送。餐廳主力供應簡易西餐,例如西冷牛扒蛋天使麵、茄汁意粉等,甜品賣相都幾精美,而且價錢親民。不過位於洪水橋,對好多粉絲嚟講,可能就遠咗少少。

* MIRROR《12》歌詞

文:Kar

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能