長壽節目《文化廣場》突停播 老臣子朱維德:無綫越做越衰

《文化廣場》主持人章志文、張美妮及朱維德(朱翁)
《文化廣場》主持人章志文、張美妮及朱維德(朱翁)

早前無綫宣布月底裁減約350人,喺一個月內更連cut三個節目,包括J2節目《兄弟幫》、TVB訪談節目《今日VIP》及文教節目《文化廣場》。由章志文、朱維德(朱翁)、關宛珊及張美妮主持嘅《文化廣場》喺1995年首播,唔經唔覺已經播放長達24年,不過喺噚日就完成歷史任務,播出最後一集。

《文化廣場》
《文化廣場》

89歲嘅朱翁係節目嘅老臣子,對於節目嘅結局,佢接受傳媒訪問時表現得相當平淡,仲話冇話捨唔捨得,佢話當年喺加拿大返香港,最初做《婦女新姿》,之後監製問佢做唔做多個節目,監製仲話呢個節目係「十衰之首」,即係最冇人看、全線最衰節目嘅No.1。朱翁話佢驚都未驚過,答應做主持仲話一年內幫監製脫十衰。下年6月約滿嘅朱翁,話《文化廣場》係佢喺無綫現階段唯一一個節目,而暫時都仲未有人搵佢傾續約,不過就有其他電視台向佢招手,所以連佢自己都未知會唔會繼續留喺幕前工作。

另外,對於無綫裁減約350人,朱翁就感到不滿,承認無綫近年節目質素下降,仲話「無綫越做越衰及立立亂」。